Gazeta britanike "The Independent", shkruan se Shqipëria po publikon informacione konfidenciale për pjesëtarët e Shërbimit Informativ Shtetëror, në atë që mund të jetë një shkelje e madhe dhe potencialisht e rrezikshme që mund të ketë pasoja ndërkombëtare.
Më poshtë pjesë nga artikulli:
Shqipëria, vend i NATO-s, po publikon informacione të ndjeshme në internet në lidhje me operatorët e tij më të lartë të inteligjencës, duke dhënë detaje rreth identitetit të tyre, automjeteve, roleve operacionale, lëvizjeve të udhëtimit dhe zakoneve të përditshme në dispozicion të publikut, në atë që duket se është një shkelje e madhe dhe potencialisht e rrezikshme dhe që mund të ketë pasoja ndërkombëtare.
Të dhënat e pagave dhe të shpenzimeve të vendosura në fletëpagesat në faqen e internetit të Ministrisë së Financave të Shqipërisë tregojnë të dhëna të hollësishme mbi Shërbimin Informativ Shtetëror, duke përfshirë vendndodhjet e zyrave në terren, tërheqjet e parave dhe detajet siç janë teknikat dhe mekanizmat që përdorin.
Të dhënat tregojnë emrat dhe numrat e kartave të identifikimit të agjentëve në shërbim, të njohur në nivel lokal dhe në komunitetin e inteligjencës si SHISH, që veprojnë brenda dhe jashtë vendit, duke përfshirë dy me poste të ndjeshme në selinë e NATO-s në Bruksel. Fletët e tabelave tregojnë emrat, pozicionet, pagat dhe shpenzimet e së paku tetë operatorëve kryesorë klandestin shqiptarë - disa që punojnë nën mbulimin diplomatik - në Belgjikë, Greqi, Kosovë, Itali, Maqedoni dhe Serbi.
"The Independent" nuk po zbulon emra ose detaje të tjera identifikimi për të parandaluar ndëshkimin kundër informatorëve të nivelit të ulët ose të tjerëve që mund të jenë të lidhur me operativët e agjencisë.
I prezantuar me shkeljet gjatë një takimi në një kafene jashtë kompleksit të fortifikuar të agjencisë në Tiranë, zyrtarët e SHISH pranuan natyrën e ndjeshme të informacionit.
"Parimi është që gjithçka nga veprimet tona duhet të jetë i fshehur, por duhet të ndjekim të gjitha këto rregulla dhe rregullore", tha një zyrtar i SHISH. "Rregullat dhe rregulloret nuk na lejojnë të shpenzojmë paratë pa e raportuar."
"Duke hyrë në sistemin e Shqipërisë ata mund të futen në sistemin e NATO-s," tha Xhemal Gjunkshi, anëtar i opozitës në parlamentin shqiptar, i cili shërben në Komisionin e Sigurisë Kombëtare dhe ishte një ish-gjeneral-major në ushtri.
Një ish-operativ i CIA-s me njohuri në SHISH e përshkroi atë si llojin e katastrofës burokratike që mund të rrezikonte jetën.
"Mund të vendosni buxhetin në internet. Por për të vënë emrat dhe detajet e tjera të agjentëve - kjo është çmenduri"
Një zëdhënës i NATO-s në Bruksel tha në një email se nuk komenton çështjet e inteligjencës.
