Deputeti i PD-së, Agron Shehaj ka reaguar mbrëmjen e sotme në lidhje me skandalin e kompanisë DH Albania, që kishte falsifikuar dokumentet.
Sipas Shehajt, biznesmenët nuk kanë ngjyra, por janë ata që punojnë vetëm për të fituar me konkurrencë.
Reagimi i plotë i Agron Shehajt:
Biznesmenët nuk kanë ngjyra, nuk janë të djathtë apo të majtë. Ka vetëm dy lloj biznesmenësh, ata që punojnë e fitojnë me konkurrencë të ndershme dhe ata që fitojnë duke marrë privilegje dhe favore nga shteti. Këta të fundit grabisin popullin dhe vendin në bashkëpunim me politikanët.
E gjithë qeverisja e Edi Ramës është konspiracion i tij me biznesmenë dhe kriminelë për ta grabitur Shqipërinë.
Skandali që po thellohet i Dunwell Habberman dëshmon jo vetëm lidhjet kriminale biznes-qeveri, por edhe përpjekjen e Edi Ramës për të pastruar paratë që fiton nga ky bashkëpunim kriminal.
Hetimi i thellë, i plotë dhe pa asnjë përjashtim në Shqipëri dhe në Amerikë i kësaj afere do të jetë një moment kthesë në luftën kundër krimit dhe korrupsionit në vend. SHBA-të që po bëjnë presion për reformën në drejtësi, tani kanë në dorë të japin shembullin e tyre se si bëhet drejtësia e vërtetë.