David Neres është ftuar për ta zëvendësuar Vinicius Juniorin, i cili u lëndua ditë më parë dhe do të mungojë dy muaj.
Talenti i Ajaxit, David Neres, pritet të debutojë me Brazilin pasi është thirrur nga Tite për të zëvendësuar të lënduarin e Real Madridit, Vinicius Junior.
Të dy talentet e rinj të Brazilit startuan në “Santiago Bernabeu” të martën në ndeshjen Real Madrid vs Ajax.
Ishte natë për t’u harruar për vendasit, dhe natë për t’u mbajtur mend për mysafirët – që triumfuan 4-1 dhe kaluan në çerekfinale të Champions League.
Vinicius nuk la gjurmë në këtë takim pasi u detyrua të largohet nga loja në pjesën e parë, kurse Neres shënoi golin e dytë për holandezët që e shokuan Madridin midis Bernabeut.
“Janë dy lojtarë të rinj të talentuar që po rriten dita ditës. I kemi përcjell ata gjatë gjithë kohës. Neres do të zëvendësojë Viniciusin, këtij të fundit i urojmë shërim sa më të shpejtë”, tha koordinatori i ekipit, Edu Gaspar.
Brazili do të përballet me 23 mars me Panaman në Portugali, ndërsa tri ditë më pas do të kenë punë me Çekinë.
