Komiteti Olimpik i Kosovës (KOK-u), para pak kohe, iu është drejtuar me një letër secilës federatë sportive në Kosovë, duke i sugjeruar konkretisht se si të veprojnë në lidhje me garat që organizohen ilegalisht nga klubet serbe në territorin e shtetit të Kosovës. Siç merret vesh, asnjë federatë nuk ka kthyer ndonjë përgjigje në drejtim të KOK-ut dhe as që kanë ndonjë plan-veprimi! Megjithatë, presidenti i Komitetit Olimpik të Kosovës, Besim Hasani, ka kërkuar nga federatat që të veprojnë dhe ai si Komitet do t’ju qëndrojë pas.
Deri me tash federatat po heshtin dhe askush nuk e di se si do të veprojnë edhe gjatë këtij edicioni të ri, kur klubet nga Serbia po futen brenda territorit tonë si në bahçe të babës dhe i zhvillojnë aktivitetet në kuadër të Serbisë. Në letrën që kemi siguruar, që iu është dërguar federatave, KOK-u ju ka bërë të qartë plan-veprimin federatave.
“Nisur nga fakti se kohëve të fundit është ngritur si shqetësim mediatik organizimi i ligave dhe garave sportive në Kosovë nga shteti fqinjë Serbia, ku përgjegjës për organizimin e garave të tilla janë vetëm organizatat sportive të Kosovës, respektivisht federatat sportive të Kosovës, një shqetësim të tillë e ndanë edhe KOK-u.
Bazuar në këtë fakt, të bashkëngjitur po ju përcjellim letrën sqaruese se si të veprohet, nëse ndonjërës nga federatat i cenohet e drejta e saj për organizimin e garave në territorin e Republikës së Kosovës, konkretisht në pjesët e banuara me popullsi jo shqiptare. Andaj, kërkojmë nga ju që të përfillen sugjerimet e shënuara në letrën e KOK-ut. Komiteti Olimpik i Kosovës ka gatishmërinë t'i mbështes federatat për ndalimin e proceseve të tilla që cenojnë integritetin sportiv në shtetit tonë”, thuhet nga KOK-u.
Letra e KOK-ut drejtuar federatave tona sportive
Po ashtu, në CC të jenë të njoftuara edhe Komiteti Olimpik i Kosovës, Komiteti Olimpik i Serbisë dhe federatat përkatëse sportive të Serbisë. Nëse një gjë e tillë nuk ka rezultat, atëherë duhet t'i drejtohemi organeve përgjegjëse të Qeverisë së Republikës së Kosovës. KOK-u shpreh gatishmërinë të ndihmojë në këtë proces, në mënyrë që bashkërisht të ndalim cenimin e sistemit tonë sportiv”, me respekt Besim Hasani, kryetar i KOK-ut. Kjo letër është dërguar me 4 prill të këtij vitit në adresë të federatave, por çuditërisht askush prej tyre nuk e ka pa të arsyeshme të konsultohet me KOK-un apo të ndërmarrin edhe ndonjë veprim ndaj garave ilegale serbe në Kosovë.