Nuk ka pasur befasi në këtë raund të Grand Slamit australian.
Roger Federer vazhdon me formë të mirë në Australian Open, duke u kualifikuar në mesin e 16 më të mirëve.
Zvicerani mposhti lehtësisht 3-0 me sete (6-2, 7-5, 6-2) amerikanin Taylor Fritz në më pak se një orë e gjysmë lojë. Deri tani 37-vjeçari nuk ka humbur qoftë një set, çka tregon se po kalon një formë shumë të mirë.
Asnjë problem edhe për Rafael Nadal. Numri 2 në botë triumfoi ndaj australianit Alex De Minaur, bartësit numër 27 të turneut, 3-0 me sete, 6-1, 6-2, 6-4, në dy orë e 24 minuta lojë. Në raundin tjetër spanjolli do të përplaset me çekun Tomas Berdych.
Në konkurrencën e femrave, spikati fitorja e Maria Sharapovës ndaj Carolina Wozniackit 2-1 me sete (6-4, 4-6, 6-3).
Petra Kvitova eliminoi Belinda Bençiq 6-1, 6-4, ndërsa Angelique Kerber kaloi pa probleme Kimberly Birrell 2-0 në sete 6-1 dhe 6-0.
