Tenisti numër 2 në ranglistën botërore, spanjolli Rafael Nadal nuk do të marrë pjesë në grand slamin US Open, i cili do të zhvillohet në fund të muajit gusht.
Lajmin e ka konfirmuar vet tenisti spanjoll, i cili ka zbuluar se frika nga koronavirusi e ka shtyrë të tërhiqet nga pjesëmarrja në këtë garë.
“Pasi kam menduar shumë, kam vendosur të mos luaj në US Open këtë vit. Gjendja është shumë e komplikuar në gjithë botën, rastet me Covid-19 po rriten, dhe duket se ne nuk e kemi nën kontroll këtë virus”, shkroi Nadal në Twitter.
Kujtojmë se përveç Nadalit, në këtë grand slam nuk do të marrë pjesë as zvicerani, Roger Federer, i cili është operuar dhe nuk do të mund të luajë deri në fillim të vitit tjetër.