US Open, eliminohet Kerber – Sharapova dhe Federer kualifikohen në 1/8 e finales

Tenis

US Open, eliminohet Kerber – Sharapova dhe Federer kualifikohen në 1/8 e finales

Më: 2 shtator 2018 Në ora: 22:33
Roger Federer (Foto: Getty Images)

Befasia e radhës në turneun US Open është regjistruar sërish në garimin e femrave. Angelique Kerber, që është numri 4 i botës, u eliminua në raundin e tretë në turneun njujorkez nga Dominika Cibulkova.

Tenistja sllovake arriti të fitojë ndaj gjermanes, me rezultat 2-1 në sete, në një ndeshje që u duk sikur ishte në kontrollin e Kerber.

Kjo e fundit fitoi në fakt setin e parë 6-3, por më pas gjeti kundërpërgjigjen e Cibulkovas, e cila fitoi dy setet e tjerë me rezultat të njëjtë 6-3, duke prerë biletën për në 1/8 e finales.

As Maria Sharapova nuk gaboi, e tashmë e sheh veten mes 16 më të mirave të turneut. Tenistja ruse mundi në raundin e tretë letonezen Jelena Ostapenko, me rezultatin 2-0.

Ajo e djeshmja ishte një sfidë ku Sharapova duket se nuk e vuri në asnjë moment në dyshim fitoren, duke i mbyllur setet me rezultatin 6-3 dhe 6-3.

Kundërshtarja e radhës së Sharapovas do të jetë spanjollja Carla Suarez Navarro që eliminoi francezen Caroline Garcia.

Për meshkuj, Roger Federer ka vijuar aventurën në Flushing Meadows. Tenisti zviceran kaloi në 1/8 e finales, pasi mundi në raundin e tretë Nick Kyrgios.

Në moshën 37-vjeçare, Federer e zgjidhi shumë lehtë përballjen me Kyrgios, duke e mbyllur atë me rezultatin 3-0, me sete 6-4, 6-1 dhe 7-5.

Sot mund të lexoni Shfletoni kopertinat