Një drekë festive në Tiranë për të moshuarit në nevojë

Tirana

Një drekë festive në Tiranë për të moshuarit në nevojë

Më: 28 dhjetor 2017 Në ora: 13:37
Dreka e shtruar nga Veliaj

Autoriteti i Mbikëqyrjes Financiare iu bashkua thirrjes së Bashkisë së Tiranës, që në prag të festave të fundvitit, të sjellë pak gëzim e dashuri për shtresat më në nevojë të shoqërisë.

Kryetari i Bashkisë së Tiranës, Erion Veliaj dhe kryetari i AMF-së, Ervin Koçi, shërbyen një drekë festive të gjithë njerëzve në nevojë, kryesisht të moshuar, që frekuentojnë Qendrën Sociale të Bashkisë së Tiranës në Bulevardin “Zogu I”. Kryebashkiaku Veliaj falenderoi AMF-në për gatishmërinë që tregoi për t’iu bashkuar nismave solidare të Bashkisë së Tiranës në kohë festash.

“Janë të rralla ato institucione të cilat thonë, nuk do të mendojmë vetëm për veten tonë, por për ne, pjesë e organizimit të fundvitit, do të jetë edhe një drekë, një vakt i ofruar për qendrat tona sociale. Ndaj, për këtë arsye të falenderoj me gjithë zemër. Arsyeja pse e them këtë është se asnjë njeri nuk ia del dot i vetëm. Një kryetar, një bashki, një staf sado të bëjë, qyteti është i stërmadh, nevoja është e stërmadhe, projektet janë shumë të komplikuara, do të thotë se asnjë s’ia del dot vetëm. Kjo është arsyeja pse për çfarëdo lloj projekti na duhet ndihmë nga të gjithë”, tha Veliaj.

Image

Ai theksoi se bamirësia duhet të jetë pjesë e jetës së secilit dhe e kujdo, ndaj dhe ftoi të gjithë ata që kanë mundësi, qofshin individë apo institucione, të bashkëpunojnë me qendrat sociale të Bashkisë së Tiranës. “U bëj thirrje të gjitha institucioneve që kanë mundësi, mund të jenë shtetërore, mund të jenë private, mund të jenë organizata joqeveritare, sikur secili të marrë përsipër një ngastër të vogël për të qenë solidarë, për të qenë bashkëpunues, për të ndihmuar dhe për të hequr një vakt, do të kemi një vit të ri që Tirana e ka të paprecedentë, plot solidaritet”, shtoi kreu i Bashkisë së Tiranës.

Veliaj tha se tashmë për Bashkinë e Tiranës sfida është edhe më e madhe, pasi ajo duhet të matet me vetveten dhe punën e saj të një viti më parë dhe jo me atë që kanë bërë të tjerët. “Gjithmonë besoj se mund të bëjmë akoma më mirë, tani krahasohemi me veten tonë, jo me të tjerët. Kur krahasohemi me veten tonë duhet që çdo vit të mundim veten tonë vjet dhe unë besoj që këtë dhjetor Tirana realisht ka pasur një solidaritet të jashtëzakonshëm në të katër cepat e saj”, u shpreh Veliaj.

Ai shprehu mirënjohje për të gjithë punonjësit që shërbejnë në qendrat sociale të Bashkisë së Tiranës, të cilët arrijnë t’i qëndrojnë pranë njerëzve në nevojë, duke nisur nga fëmijët në situatë rruge e deri tek të moshuarit në nevojë apo të braktisur. “Një urim e kam për të gjithë ata që shërbejnë në qendrat tona sociale dhe të gjithë punonjësit socialë, ata që merren me higjienën, me transportin, me logjistikën, tek terapistët. Një pjesë e madhe e punës në qendrat sociale është me fëmijët e rrugës, me raste shumë të vështira, me qytetarë që mund të jenë dhunuar, siç mund të jenë zonja, zonjusha nga familje, apo realitete shumë të vështira. Puna e një punonjësi social është puna më e vështirë në bashki”, tha kryebashkiaku Veliaj.

Kryetari i Autoritetit të Mbikëqyrjes Financiare, Ervin Koçi, vlerësoi punën e bërë nga Bashkia e Tiranës në mbështetje të shtresave në nevojë dhe për moshën e tretë. “Punonjësit në institucionin që unë drejtoj të AMF kanë kontribuar të gjithë modestisht për të qenë pranë jush në këto ditë festash. E ndjej për detyrim për të qenë pranë jush dhe besoj se ju meritoni më shumë. Bashkia po bën shumë dhe kam bindjen se edhe më shumë do bëhet”, tha Koçi. Ai theksoi se në këto ditë festash, të gjithë duhet të jenë më pranë njerëzve që janë në vështirësi.

Image
Sot mund të lexoni Shfletoni kopertinat