Në Superligën e Kosovës në volejboll, në konkurrencën e meshkujve, po zhvillohet një rivalitet i madh mes skuadrave në luftë për pozitën e parë. Prishtina Volley është lider me 31 pikë, ka 4 më shumë se Luboteni nga Ferizaj dhe gjashtë se Theranda e cila renditet në pozitën e tretë në klasifikim!
Volejbollisti më i mirë në vendin tonë, Habil Ajeti, i cili është alfa dhe omega në radhët e Lubotenit, mendon se kanë një ekip shumë të fortë dhe që mëtojnë të gjitha trofetë. Ajeti që luan në pozitën e korrektorit, shprehet për gazetën kombëtare “Bota sot”, se humbja nga Prishtina Volley më shumë ka qenë si rrjedhojë që nuk e kishin ditën e tyre por edhe kishin disa mungesa të rëndësishme. Si e sheh pjesën e dytë të kampionatit, a do të jetë më cilësor se vjeshta?
“Nuk mendoj se do të jetë si viti i kaluar për arsye se ekipet nuk kanë marrë përforcime përveç KV Lubotenit, ekipet tjera do të mundohen me lojtarë vendorë të garojnë”, tha Ajeti. Volejbollisti ka një mendim interesant sa i përket asaj se a do të janë apo jo në garë të fortë në luftë për titullin e kampionit: “Nuk besoj se është në garë të fortë, por përparësitë tona janë se ne kemi lojtar me cilësor. Por në sport nuk i dihet, se si KV Luboteni si ekipet tjera do të luftojnë për titullin kampion edhe Kupën e Kosovës”.
Ai e uron Prishtinën për fitoren, duke thënë: “Pikësëpari Prishtinës ia uroj fitoren, është thjesht një ndeshje e humbur, kështu që neve na mbetet të punojmë më shumë”. Për herë të parë në sportin skofiar përdoret një sistem i ri i garave, ku nga dhjetë skuadrat sa ishin në vjeshtë, tani 6 janë në Superligën A dhe sipas kësaj, pothuajse secila sfidë do të jetë edhe si derbi, për faktin se takohen secili me secilën dhe zhvillohen dhjetë ndeshje deri në garat e play-off-it. “Normal se ky sistem është shumë i mirë, ka më shumë derbi, ndeshje më cilësore, garojnë 6 ekipet më të mira”, tha Ajeti.
Prishtina katër pikë ka më shumë se Luboteni, a iu frikëson kjo epërsi? “Prishtina fitoi edhe në kampionatin vjeshtor por ne e treguam se kush jemi në finalen e Kupës së Federatës, kështu që mbetet të shihet në fund”, tha ai. Volejbollisti është i kënaqur me kushtet dhe zotohet se do të jap maksimumin deri në fund për realizimin e qëllimeve që kanë. “Pikësëpari e përshëndes kryesinë e KV Lubotenit për respektin dhe besimin që kanë ndaj meje. Kushtet janë shumë të mira, e mira kthehet më të mirë dhe do të jap gjithçka nga vetja për të parë KV Lubotenin kampion dhe fitues të Kupës”, ka thënë Ajeti.