Ylli Kadriu, kryetrajner i Skenderajt, është shprehur optimist para sfidës finale të Kupës së Kosovës në volejboll (femrat), se do të japin maksimumin kundër M-Technologie Prishtina, ndeshje që luhet sot në orën 14.30 në palestrën “1 Tetori” në Prishtinë. “Ndoshta përparësitë e KV Skenderajt janë që këto vite jemi mësuar të jemi në finale dhe nuk kemi fare presion në këto ndeshje të finaleve.
Mandej përparësia tjetër është që jemi ekip e kompletuar ku mund te sulmojmë nga çdo pozicion, gjë që kundërshtarit ia vështirëson punën. Pritet të jetë finale e fortë, sepse kemi të bëjmë me një ekip të kompletuar dhe shumë të përforcuar këtë sezon, megjithatë mendoj se nëse jemi 100% të fokusuar në ndeshje, mund të ia dalim, të sjellim Kupën në Skenderaj.
Skuadra jonë është komplete, disa lojtare që i kemi pasur të lënduara ose me probleme shëndetësore kanë filluar ta marrin veten dhe do të jenë shumë të rëndësishme në këtë finale të madhe”, tha Kadriu.
