Me padurim pritet finalja e parë e play-off-it të Superligës A në volejboll (femrat), mes M-Technologie nga Prishtina dhe Skenderajt. KV M-Technologie ka bërë të gjitha përgatitjet e nevojshme para sfidës së nesërme që luhet në orën 20.00 në palestrën e sportit “1 Tetori” në Prishtinë.
Kryetrajneri i M-Technologie, Naser Krasniqi, tha se janë të përgatitur maksimalisht, nuk kanë edhe probleme me lëndime.
“Ekipi është i përgatitur maksimalisht në çdo aspekt për finalen e nesërme.
Sa i përket përparësive mendoj se si ne si kundërshtari i kemi karakteristikat e njëjta, ku shquhet blloku i lart si dhe sulmi.
Ekipi im është i kompletuar, nuk kemi asnjë mungesë dhe jemi po ajo ekip e njëjtë sa i përket lojtareve që ka filluar kampionatin”, tha Krasniqi për gazetën kombëtare “Bota sot”. M-Technologie pretendon titullin e tetë të Kosovës.