Akil Gjakova (66 kg) e Distria Krasniqi (52 kg), arritën suksese të mëdha në garat Frankofone, që po mbahen në Abixhan të Bregut të Fildishtë. Xhudisti Akili dhe xhudistja Distria u stolisen me medalje të artë, duke bërë krenarë shtetin e Kosovës. Kryetari i Federatës së Xhudos së Kosovës, Agron Kuka, deklaroi se ky sukses është treguesi më i mirë se xhudistet janë në formën më të mirë të mundshme. “Akili ishte pjesëmarrësi i dytë nga xhudo në lojërat frankofone dhe edhe ai si Distria u stolis me medalje të artë nga kjo garë prestigjioze.
Ky rezultat është për lakmi, por nuk është rezultati më i mirë i Akilit, rezultati më i mirë është vendi i tretë në Kampionatin Evropian U-23”, ka thënë Agroni për gazetën kombëtare “Bota sot”. A mendoni se Akili është gati për Kampionatin Botëror dhe a do të jetë ndër befasitë e kësaj ngjarje? “Çka mund të them, Akili është në formë shumë të mirë dhe i përgatitur në maksimum! Edhe pse në kategorinë më konkurruese pritet qe Akili të nxjerr me të mirën nga vetja dhe të na gëzoj me medalje!”, thotë Kuka.