Çështja e dinarit është çështje interne dhe për këtë gjë bashkësia ndërkombëtare as lindja e as perendimi nuk kanë arsye të hidhërohen". Kështu deklaroi në “Info Plus” në RTK, njohësi i çështjeve juridike Mazllum Baraliu.
“Kemi të bëjmë më një vendim të një organi sovran siç është Banka Qëndrore. S’ka të bëjë asgjë me politikë, as me Qeveri e as me ndonjë qytetar. Nuk është dashtë të bëhet dhe nuk duhet të bëhet problem, nuk i prishë marrëdhëniet kjo“, tha Baraliu.
“BE është treguar jo vetëm këto vite por edhe para kësaj qeverie e njëanshme, e padrejtë dhe jo parimore ndaj Kosovës…por edhe qeveritarët tanë janë dëshmuar të papërvojë, të ngutshëm dhe emotiv në diplomaci”, theksoi mes tjerash ai.
E rreth procesit të peticioneve për shkarkimin e kryetarëve në veri të vendit Baraliu tha se nuk do të ketë zhvillime të shpejta sepse janë disa çështje procedurale dhe të rëndësishme që marrin kohë.
“Në fazën në të cilën ndodhet KQZ-ja është verifikimi i të dhënave. Pasi të vërtetohet që çdo gjë është në rregull në aspektin juridik, ligjor, pastaj pason ai votim apo referendum siç po e quajnë”, tha Baraliu.
Sipas tij do të duhej të jenë mbi 50% e njerëzve të cilët janë në listën zgjedhore, në regjistrin civil të katër komunave veriore të cilat duhet ta përmbushin 50+1% që të votojnë për shkarkim, duke shtuar se pastaj hapet rruga për shpalljen e zgjedhjeve të reja, të parakohshme dhe të jashtëzakonshme në katër komunat veriore dhe që duhet të mbahen brenda afatit ligjor minimum 30 ditë, maksimumi 45 ditë.
“Ka pasur po ashtu situata të ndikimit të “Listës Serbe”, faktikisht të Beogradit i cili vetë i ka shkaktuar këto kriza, tërheqjen nga institucionet, tërheqjen nga komunat të kryetarëve të tyre dhe tërheqjen e disa asamblistëve, dhe tani ka mobilizuar njerëz në mënyrë artificiale për të qenë ai mobilizim i 20% për tu dukur bindës jo sa duhet dhe si duhet”, tha mes tjerash Mazllum Baraliu.
