Njerëzit në Korenë e Veriut i kanë thënë BBC-së se ushqimi është aq i pakët, se fqinjët e tyre kanë vdekur nga uria.
Intervistat ekskluzive të mbledhura brenda shtetit më të izoluar në botë sugjerojnë se situata është më e keqja që ka qenë që nga vitet 1990, thonë ekspertët.
Qeveria e Koresë së Veriut mbylli kufijtë e saj në vitin 2020, duke ndërprerë furnizimet jetike. Ajo gjithashtu ka forcuar kontrollin mbi jetën e njerëzve, thonë të intervistuarit e BBC-së. Ky medium raporton se ka pyetur fshehurazi tre njerëz të zakonshëm në Korenë e Veriut, me ndihmën e organizatës Daily NK e cila operon një rrjet burimesh në vend.
“Ata na thanë se që nga mbyllja e kufirit kanë frikë se ose do të vdesin nga uria ose do të ekzekutohen për shkelje të rregullave. Është jashtëzakonisht e rrallë të flasësh me njerëzit që jetojnë në Korenë e Veriut”.
Intervistat zbulojnë një “tragjedi shkatërruese që po shpaloset” në vend, tha Sokeel Park nga Liberty në Korenë e Veriut (LiNK), e cila mbështet të arratisurit koreano-veriorë.
Një grua që jetonte në kryeqytetin Phenian tha se njihte një familje prej tre anëtarësh që kishin vdekur nga uria në shtëpi.
“Trokitëm në derën e tyre për t’u dhënë ujë, por askush nuk u përgjigj”, tha Ji Yeon. Kur autoritetet hynë brenda, i gjetën të vdekur, tha ajo. Emri i Ji Yeon është ndryshuar për ta mbrojtur atë, së bashku me ato të të tjerëve që u intervistuan.
