Shirat e dendur përmbytën zona në provincën verilindore të Punjabit të Pakistanit, duke bërë që autoritetet të intensifikojnë evakuimet , raportuan zyrtarët dhe mediat lokale.
Kryeministri në detyrë Punjab Mohsin Naqvi tha në një postim në Twitter se të paktën 40 fshatra të rrethit Jhang janë prekur nga përmbytjet e furishme për shkak të prurjes së lumit Chenab.
Autoritetet në rrethet Okara, Pakpattan, Bahawalnagar dhe Wazirabad të Punjabit janë vënë në “gadishmëri të lartë” për shkak të kërcënimit nga përmbytjet, tha në një deklaratë Autoriteti Provincial i Menaxhimit të Fatkeqësive (PDMA).
Mbi 80 kampe janë krijuar nga qeveria në rrethet e përmendura për të akomoduar banorët e evakuuar.
Departamenti Meteorologjik i Pakistanit ka parashikuar një periudhë të re shirash musonesh nga 13 deri më 17 korrik në pjesët e sipërme dhe qendrore të vendit, duke paraqitur kërcënime përmbytjesh për disa rrethe.
Përveç Chenab, lumenjtë Sutlej dhe Ravi po rrjedhin gjithashtu në përmbytje të moderuara deri në të larta për shkak të reshjeve masive në shtetet veriore të Indisë, ku ndodhen zonat ujëmbledhëse të dy trupave ujorë.
Pas reshjeve masive, India po lëshon më shumë ujë drejt zonave në rrjedhën e poshtme të Pakistanit.
Ndërkohë, Ministrja e Ndryshimeve Klimatike Sherry Rehman, në një postim në Twitter, paralajmëroi për përmbytjet urbane, stuhitë dhe rrëshqitjet e dheut gjatë periudhës së musonit të ri, duke u bërë thirrje turistëve që shkojnë në ato rajone “të tregojnë kujdes për të shmangur fatkeqësitë”.
Të paktën 76 persona janë vrarë dhe mbi 150 janë plagosur nga shirat masive dhe përmbytjet që nga qershori, sipas statistikave zyrtare.
