Katër palestinezë u vranë nga zjarri i hapur nga ushtria izraelite në qytetin e Jeninit në Bregun Perëndimor të pushtuar sot herët, njoftoi një burim mjekësor lokal, raporton Anadolu.
“Që të katër humbën jetën në përleshjet me forcat izraelite okupuese në Jenin”, tha burimi për Anadolu, duke shtuar se nëntë të tjerë u plagosën në përleshjet me forcat izraelite në qytet.
Më shumë se 100 automjete ushtarake izraelite dhe dy buldozerë u futën në Jenin sot herët, së bashku me një aeroplan zbulimi që fluturonte sipër, thanë dëshmitarët okularë.
Sipas burimit mjekësor, buldozerët izraelitë rrënuan muret e jashtme të spitalit “Khalil Suleiman” në qytet.
Duke cituar një burim lokal të sigurisë, agjencia shtetërore e lajmeve Wafa tha se një dron izraelit qëlloi një raketë në një shtëpi në kampin e refugjatëve Jenin, ku një i ri palestinez pësoi lëndime nga shrapnelët.
Tensionet janë rritur në gjithë Bregun Perëndimor mes një fushate masive bombardimesh izraelite në Rripin e Gazës. Sipas shifrave palestineze, të paktën 117 palestinezë janë vrarë nga ushtria izraelite që nga 7 tetori.
Izraeli ka bombarduar rëndë Gazën që nga 7 tetori, kur Hamasi kreu një sulm ndërkufitar.
Numri i palestinezëve të vrarë në sulmet izraelite në Gaza është rritur në 8.005, duke përfshirë 3.342 fëmijë, 2.062 gra dhe 460 të moshuar, sipas Ministrisë së Shëndetësisë.
Më shumë se 1.400 izraelitë janë vrarë në konflikt.
Zëdhënësi i ushtrisë izraelite Daniel Hagari njoftoi të shtunën se forcat izraelite po zgjerojnë operacionet e tyre dhe po kalonin në “fazën tjetër të luftës kundër Hamasit”, e cila përfshin operacionet tokësore.
Për shkak të bllokadës së enklavës nga Izraeli, 2,3 milionë banorët e Gazës po përballen me mungesë të ushqimit, ujit, karburantit dhe ilaçeve.
