G7 dikur përfaqësonte shtetet më të fuqishme në botë. Por Kina gjithnjë e më shumë zgjeroi fuqinë e saj ekonomike dhe politike, thuaja grupi i udhëheqësve perëndimorë u shpërbë. Tani G7 po kthehet sërish dhe duan të mbrojnë rendin e vjetër ndërkombëtar.
Vendet e G7 duan të punojnë më ngushtë së bashku për të frenuar ndikimin në rritje të Kinës në botë. Në një takim në Londër, ministrat e jashtëm të fuqive ekonomike perëndimore ranë dakord të bëhen më aktivë, veçanërisht në rajone të dobëta strukturore në Afrikë, Amerikën Latine dhe Evropën Juglindore. "Ne duam të merremi shumë më intensivisht, me shkallën në të cilën Kina po përdor fuqinë e saj ekonomike, për të zgjeruar ndikimin e saj gjeostrategjik në të gjithë botën," tha Ministri Federal i Jashtëm Heiko Maas në fund të diskutimeve. "Ne duam ta kundërshtojmë këtë."
Maas gjithashtu bëri thirrje për një përqendrim më të fortë në çështjet e të drejtave të njeriut në politikën e Kinës. "Ekzistojnë interesat ekonomike gjithashtu, por çështjeve të të drejtave të njeriut dhe lirive civile duhet t'u jepet më shumë hapësirë, kur bëhet fjalë për Kinën," tha politikani i SPD. "Ne të gjithë besojmë se është shumë më efektive të ndërmarrim fuqishëm çështje të tilla sikur janë të drejtat e njeriut, ose liria e shtypit edhe kundër një vendi siç është Kina, por nëse e bëjmë atë së bashku, shprehim solidaritetin dhe fuqinë tonë," shtoi Ministri i Jashtëm. Në të njëjtën kohë, ata gjithashtu dëshirojnë të bëjnë oferta konkrete të përbashkëta, për bashkëpunim në të ardhmen me vendet në Afrikë ose Amerikën Latine, në të cilat Kina dëshiron të zgjerojë ndikimin e saj gjeostrategjik.
G7 e sheh veten si një grup shtetesh që përfaqësojnë komunitetin perëndimor të vlerave. Ai përfshin SHBA, Britaninë e Madhe, Gjermaninë, Francën, Italinë, Japoninë dhe Kanadanë. Politika e Kinës deri më tani ka qenë e diskutueshme midis evropianëve dhe SHBA-ve. Amerikanët po ndjekin një kurs shumë më të ashpër ndaj Pekinit. Veprimet e udhëheqjes kineze kundër pakicës muslimane ujgure po denoncohen më ashpër nga SHBA, gjithashtu marrëveshja e investimeve që sapo është arritur midis Bashkimit Evropian dhe Kinës, shihet në mënyrë kritike nga aleatët e sidomos nga SHBA. Ekzistojnë gjithashtu ndryshime në lidhje me pjesëmarrjen e mundshme të gjigandit kinez të telekomunikacionit Huawei në zgjerimin e rrjetit të shpejtë celular 5G.
Ministrat e jashtëm ishin takuar tashmë të hënën për takimin e tyre tre-ditor, i cili do të merret me të gjitha çështjet e rëndësishme ndërkombëtare. Sidoqoftë, fokusi është sesi demokracitë perëndimore pozicionohen në raport me shtetet autoritare si Kina dhe Rusia.
Samiti me Biden në qershor
"Ne jemi duke u përpjekur të mbajmë rendin bazuar në rregullat ndërkombëtare, në të cilat vendet tona kanë investuar kaq shumë, për kaq shumë dekada," tha Sekretari i Shtetit i SHBA Antony Blinken gjatë mbërritjes së tij në Londër. Nëse një vend - qoftë Kina apo një shtet tjetër - vë në dyshim këtë rend, "ne do të ngrihemi dhe do të mbrojmë rendin tonë". Është takimi i parë ballë për ballë i ministrave të jashtëm të G7 në këto dy vjet. Koreja e Jugut, Australia, India dhe Afrika e Jugut janë ftuar gjithashtu në bisedimet në Londër. Presidenca Britanike dëshiron ta bëjë G7 edhe më shumë një forum qendror, për demokracitë e mëdha.
Për Britaninë e Madhe dhe Kryeministrin Boris Johnson, presidenca e G7 në vitin e parë pas Brexitit është një mundësi për të raportuar përsëri në skenën botërore si një komb energjik. Ministri i Jashtëm Dominic Raab ka shprehur vazhdimisht kritika të mprehta, për shkeljet e të drejtave të njeriut në Kinë dhe Mianmar, për shembull. Pa BE, Mbretëria e Bashkuar mund të reagojë më fleksibël dhe më shpejt, thuhet në Londër.
Raab tha: "Presidenca e G7 e MB-së është një mundësi për të bashkuar shoqëri të hapura, demokratike dhe për të demonstruar unitet, kur është urgjente koha për të adresuar sfidat e përbashkëta dhe kërcënimet në rritje." Në takimin e Londrës, samiti i G7 i kryetarëve të shteteve dhe qeverive do ta parapërgadit takimin në Cornwall nga data 11 deri më 13 qershor. Ky do të jetë takimi i parë i samitit të madh me Presidentin e ri të SHBA Joe Biden.
Çështje e grindjes mbetet Nord – Stream 2
Gjatë mandatit të paraardhësit të tij Donald Trump, G7 kishte humbur shumë nga rëndësia e tij. Trump kishte pak interes në formatin e bisedimeve dhe madje më vonë e hodhi poshtë deklaratën përfundimtare. Asnjë samit i rregullt nuk u zhvillua nën presidencën e tij vitin e kaluar - i cili, megjithatë, kishte të bënte edhe me pandeminë e kurorës. "Në fakt nuk kishte më G7, sepse Shtetet e Bashkuara ishin tërhequr prej kohësh," tha Maas në atë kohë. "Tani është ndryshe".
Tani grupi do të bëhet forum përmes të cilit do të zhvillohet konkurrenca midis demokracive dhe autokracive. Ministri i Jashtëm gjerman gjithashtu e përdori takimin për një bisedë dypalëshe me Blinken, e cila zgjati 40 minuta, dy herë më shumë se sa ishte planifikuar. Nuk kishte asnjë afrim në mosmarrëveshjen mbi tubacionin e gazit Nord Stream 2. "Pozicionet që ne i njohëm reciprokisht u shkëmbyen përsëri," tha Maas. "Nuk ka asnjë lajm".
Gazsjellësi pothuajse i përfunduar midis Rusisë dhe Gjermanisë ka qenë një nga pikat kryesore të grindjeve në marrëdhëniet gjermano-amerikane për vite me rradhë. Ndryshimi i qeverisë në Uashington në fillim të vitit nuk bëri asgjë për ta ndryshuar atë. SHBA frikësohen se Evropa është shumë e varur nga gazi rus dhe dëshiron të ndalojë projektin me sanksione. Ithtarët e tubacionit kundërshtojnë amerikanët se ata po kërkojnë vetëm mundësi më të mira shitjeje për gazin e tyre të lëngshëm në Evropë. Maas theksoi se mosmarrëveshja me SHBA mbi tubacionin përbënte vetëm një "pjesë të vogël" të marrëdhënieve dypalëshe. "Me përjashtim të këtij problemi, unë (...) nuk shoh ndonjë mosmarrëveshje për momentin, që madje do të filloja ta përshkruaja si serioze." Gjermania dhe SHBA janë aktualisht duke punuar që marrëdhënjet e dëmtuara nga era Trump sërish t´i riparojnë.
