Agjencia Qendrore e Inteligjencës e ShBA-së ka publikuar një video në gjuhën ruse një përpjekje kjo për të bindur punonjësit e inteligjencës ruse të ndryshojnë anën dhe të punojnë si agjentë të dyfishtë për Uashingtonin.
“Ata përreth jush mund të mos duan të dëgjojnë të vërtetën. Por ne e bëjmë. Ju nuk jeni të pafuqishëm”, thuhet në videon e publikuar në kanalin zyrtar të CIA-s në platformën X, përpara se të detajohen mënyrat për të kontaktuar me CIA-n.
I shoqëruar me muzikë klasike melankolike, personazhi kryesor, imagjinar i videos është një punonjës mashkull 35-vjeçar i paidentifikuar i agjencisë së inteligjencës ushtarake të Rusisë, i cili e tregon veten si një patriot që e do Rusinë dhe që dikur ka shërbyer si parashutist.
“A kam guxim të mjaftueshëm për t’u përballur me këtë tradhti?” video e tregon atë duke thënë, para se të thotë se e ka kuptuar se armiku i vërtetë është brenda Rusisë në formën e një lidershipi dhe elite të korruptuar.
Personazhi imagjinar thotë se patriotizmi i tij e ka nxitur të veprojë dhe të punojë me CIA-n, dhe xhirimi i fundit i videos përshkruan një burrë të veshur mirë duke kontaktuar CIA-n me telefon celular nga një oborr me dëborë.
