Bordi i Drejtorëve të Agjencisë Kosovare të Privatizimit sot në mbledhjen e radhës aprovoi rregulloren për organizimin e brendshëm dhe sistematizimin e vendeve të punës në AKP.
Po ashtu u aprovua edhe plani vjetor i punës dhe performancës së AKP-së për vitin 2023, transaksionet e shitjes së aseteve përmes likuidimit numër 60, si dhe raporti i Komisionit të Banesave për shitjen e 27 banesave në pronësi të ndërmarrjeve shoqërore në bazë të kërkesave të parashtruara nga shfrytëzuesit legal të tyre sipas procedurave ligjore në fuqi.
Në lidhje me procesin e likuidimit, Bordi aprovoi inicimin e procedurave të likuidimit për ndërmarrje shoqërore/asete: Industria e Qeramikës KIS, Gjilan; “Gazela”, Prishtinë dhe “SirovinaBanat”, Prishtinë.
Bordi po ashtu u njoftua me raportet përfundimtare për ndërmarrjet shoqërore në likuidim: Kooperativa Bujqësore "Prapaçani" - Deçan dhe për “KB Kuqishte” Pejë, përderisa këto raporte përfundimtare dërgohen në Dhomën e Posaçme të Gjykatës Supreme për aprovim dhe mbyllje të këtyre ndërmarrjeve.
Gjatë kësaj mbledhje u aprovuan edhe raportet e shpërndarjes së përkohshme për kreditorët e ndërmarrjeve “Drita Hotel” Ferizaj, “Duhani” Prishtinë, “Shipad Komerc” Pejë dhe “XIQ Karaqeva” Kamenicë.
Gjatë këtij takimi të Bordit, menaxhmenti i AKP-së prezantoi raportin mujor të aktiviteteve për periudhën paraprake, si dhe raportin mujor për ndërmarrjen shoqërore Brezovica, e cila është nën administrim direkt, ku janë duke u bërë përgatitjet për sezonin dimëror.
