Me rastin e festës kombëtare, mbrëmë opozita hungareze ka mbajtur një demonstratë antiqeveritare në Budapest, në të cilën sipas vlerësimeve kanë marrë pjesë rreth 10 mijë persona.
Udhëheqësi i ri i opozitës, Peter Magyar, biznesmen dhe ish-anëtar i partisë qeverisëse Fidesz të kryeministrit Viktor Orban, njoftoi gjatë protestave se ai po përgatitej të formonte një parti të re për të zëvendësuar Fidesz-in pas 14 vjetësh në pushtet.
“Çfarëdo të mete që mund të ketë Bashkimi Europian, ai është një klub në të cilin ne jemi anëtarë”, tha Magyar në një fjalim në protestë, duke theksuar rëndësinë e bashkëpunimit me Brukselin.
“Ju mund të jetoni pa demokraci, por në të vërtetë nuk ia vlen”, tha ai, duke aluduar në mënyrat autokratike të qeverisjes së Orbanit. Ai shtoi se regjimi i Orbanit mund të mposhtet në zgjedhjet demokratike “ndoshta edhe më shpejt sesa shumë mendojnë”.
Magyar është ish-bashkëshorti i ish-ministres së Drejtësisë dhe aleates së Orbanit, Judita Vargova. Ajo dha dorëheqje një muaj më parë për shkak të aferës me faljet e presidenciale të të burgosurve.
Magyar ka një pasqyrë të mirë të funksionimit të partisë së Orbanit dhe javët e fundit ka bërë thirrje për një ndryshim të plotë dhe ka publikuar informacione të ndjeshme në lidhje me funksionimin e brendshëm të qeverisë hungareze.
Ndryshe, Orban u bëri thirrje votuesve të rebelohen kundër Brukselit dhe paralajmëroi për tërheqjen e Hungarisë në një luftë me Rusinë.
