Me ftesë të presidentit të KF Kukësit, Safet Gjici dhe presidentit të FSHF-së, Armand Duka, presidenti i FFK-së, Agim Ademi, të shtunën, ka marrë pjesë në inaugurimin e stadiumit të ri “Kukës Arena”.
Kësisoj pas më shumë se dy vitesh skuadra kuksiane është rikthyer në shtëpinë e saj të re, ku është zhvilluar edhe ndeshja ndërmjet Kukësit dhe Laçit.
“Kukës Arena” është një tjetër vepër madhore e infrastrukturës sportive, investim i përbashkët i FSHF-së dhe Qeverisë shqiptare.
Pjesë e inaugurimit ishte edhe kryeministri shqiptar, Edi Rama, derisa tribunat e stadiumit ishin përplotë me tifozë, të cilët që një kohë të gjatë kishin pritur rikthimin e skuadrës së zemrës në qytetin e tyre.
Para ndeshjes u mbajt edhe një program i pasur artistik.
