Skuadra e Tiranës në basketboll për femra ka nisur menjëherë nga puna për sezonin e ardhshëm 2022-2023. Bardheblutë kanë nisur kompletimin e ekipit dhe gjatë orëve të fundit kanë arritur marrëveshjen me 3 basketbolliste që sezonin e fundit kanë luajtur me rivalet e Partizanit.
Lajmin e konfirmon klubi bardheblu, që bën publike edhe emrat e 3 lojtareve. Bëhet fjalë për Aida Palko, Dajana Baraj dhe Ebi Dishnica. Tri përforcime me vlera për skuadrën e trajneres Mirza Alibegaj, që ka pretendime serioze për sezonin e ardhshëm sportive.
Të trija këto bsketbolliste janë me përvojë në kampionatin shqiptar, ku luajnë prej vitesh. Spikat emri i Aida Palkos, që ka luajtur edhe më parë me Tiranën. Ndërkohë, në kahun e kundërt ka udhëtuar Miral Lugaj, që ka lënë bardheblutë për t’u transferuar te Partizani.
Sipas klubit bardheblu, merkato nuk do të ndalet këtu, pasi do të synohet edhe ndonjë përforcim i huaj. Një ose dy basketbolliste nga jashtë pritet t’i bashkohen më vonë skuadrës së Tiranës, që synon të rikthehet në elitë.
