Willian nuk ka ndërmend të rikthehet në Brazil.
34-vjeçari u transferua shtatorin e kaluar si lojtar i lirë nga Corinthians te Fulham në Premier League.
Sulmuesi i majtë brazilian firmosi për një vit me klubin londinez.
Dhe deri në këtë fazë të sezonit numëron 3 gola dhe 4 asiste në kampionatin anglez.
Willian shpreson të rinovojë me Fulhamin, ndërkohë që nuk e merr fare në konsideratë rikthimin në vendlindje.
“Unë nuk dua të rikthehem të luaj në Brazil.
Kurrë më atje, sepse ekziston një presion i pamëshirshëm. Që ndonjëherë shkakton dhunë dhe kërcënime ndaj familjes e fëmijëve.
Kur arrihet kjo pikë, çdo gjë ndryshon për mua. Më duhet ta mbroj familjen time, që është gjëja më e çmuar që kam”, u shpreh lojtari i njohur, autor i 70 ndeshjeve me kombëtaren e Brazilit.
