Zemërimi vazhdon të rritet në mesin e tifozëve të futbollit në Bullgari për rezultatet e dobëta të ekipit kombëtar, i cili nuk ka arritur të kualifikohet në ndonjë kompeticion të madh dhe ka pasur një sërë ndryshimesh trajnerësh gjatë dy dekadave të fundit.
Gati 60 eprorë të policisë dhe tifozë u plagosën në përleshjet në Sofje të enjten mbrëma pas ndeshjes kualifikuese për Euro 2024 mes Bullgarisë dhe Hungarisë që u luajt me dyer të mbyllura, bëhet e ditur të premten nga autoritetet bullgare.
Sa i përket protestuesve, "24 persona u trajtuan për lëndime, duke përfshirë shtatë të shtruar në spital për lëndime në kokë, fraktura etj." tha Katia Sungarska, zëdhënëse e departamentit të urgjencës së qytetit.
Policia, nga ana tjetër, raportoi për 33 të plagosur në radhët e tyre, duke përfshirë "disa me lëndime të rënda". Më tej janë arrestuar 33 tifozë, mes të cilëve edhe “ultra”, ndërkohë që vijojnë kërkimet për rebelët.
Ndeshja përfundoi baras (2:2), gjë që i lejoi hungarezët të kualifikohen në Euro 2024.
Me vetëm tre pikë të fituara nga shtatë ndeshje, Bullgaria është e fundit në Grupin G. Tifozët nga e gjithë Bullgaria erdhën për të kërkuar dorëheqjen e presidentit të Federatës së Futbollit, Borislav Mihaylov, i cili e drejton atë për 18 vjet.
Pjesëmarrësit në tubim hodhën fishekzjarre, gazlotsjellës, shishe birre, madje edhe gurë e shtylla trafiku dhe i vunë flakën një automjeti të policisë.
Sipas shifrave zyrtare, policia përdori topa uji për të shpërndarë masën prej rreth 4,000 personash.
