Paolo Maldini është gati të kthehet në rrugën e duhur. Pothuajse një vit pas ndarjes traumatike me Milanin, ish-kapiteni dhe drejtori i kuqezinjve thuhet se është afër rikthimit në botën e futbollit. Aventura e re e Maldinit duhet të jetë larg Italisë, përkatësisht në ligën më të rëndësishme në Evropë, Premier League.
Emri i tij është ndër kandidatët kryesorë për rolin e drejtorit sportiv. Por cili klub është i interesuar për Maldinin? “Fondi PIF” e ka identifikuar Maldinin si profilin e duhur për rolin e drejtorit sportiv të Newcastle, ku do të gjente edhe ish-lojtarin tjetër kuqezi, Tonali.
Mediat britanike raportuan për këtë, veçanërisht “The Sun” dhe “The Independent”. Përvoja e vetme menaxheriale e Paolo Maldinit deri më sot mbetet ajo e fituar në Milano, ku në vitin 2018 u rikthye nga fondi Elliott si drejtor i zhvillimit strategjik për zonën sportive.
Në vitin 2019, pas lamtumirës së Leonardos, ai mori rolin e drejtorit të zonës teknike. Nën drejtimin e tij, Milani u kthye në Champions League dhe fitoi një titull të Serie A. Megjithatë, në qershor 2023, Milani, i cili ndërkohë kishte kaluar në duart e “RedBird”, njoftoi ndarjen me të përmes një deklarate:
“AC Milan njofton se Paolo Maldini e përfundon rolin e tij në klub me efekt nga 5 qershori 2023. E falënderojmë për kontributin e tij në vitet e fundit, me rikthimin e Milanit në Champions League dhe me fitimin e titullit në sezonin 2021/22. Përgjegjësitë e tij do t’i caktohen një grupi pune të integruar që do të punojë në kontakt të ngushtë me trajnerin e ekipit të parë, duke raportuar drejtpërdrejt te CEO”.
I intervistuar nga “La Repubblica” pak muaj më vonë, Maldini përdori fjalë shumë të ashpra ndaj Gerry Cardinale: “Me të, në një vit punë kam pasur vetëm një bisedë, plus 4 mesazhe nga ai. Tha se duhet t’i besojmë njëri-tjetrit, por nuk e bëri. Se si shkoi dihet, besoj që vendimi për të na pushuar ishte marrë muaj më parë, kishte nga ata që e dinin.
Dita e shkarkimit? Cardinale më tha se Massara dhe unë pushoheshim nga puna. E pyeta pse dhe ai më tha për marrëdhënie të këqija me CEO Furlani. Aty për aty i thashë: A të kam telefonuar ndonjëherë për t’u ankuar për të? Asnjëherë”.
