Një hotel në Podujevë është sulmuar me armë zjarri të premten në mbrëmje.
Rasti dyshohet se ndërlidhet me kërkim të haraçit nga të dyshuarit dhe është nën hetime nga Policia e Kosovës.
Disa persona janë të dyshuar për rastin, tha Policia e Kosovës në raportin 24-orësh të publikuar të shtunën.
Pronari restorantit “Iliria Hill Resort” e ka denoncuar rastin rreth orës 22:00 të mbrëmjes së të premtes. Ka deklaruar se disa persona kanë shtënë me armë zjarri në drejtim të hotelit.
Ai, po ashtu ka deklaruar se njëri prej të dyshuarve i kishte kërkuar një shumë të parave rreth dy muaj para incidentit.
“I njëjti [ankuesi] deklaron se njëri prej të dyshuarve dy muaj me herët i ka dërguar një mesazh duke i kërkuar një shumë parash”, citohet të ketë thënë ai në Polici.
Në vendin e ngjarjes, në fshatin Shamalluk të Podujevës, Policia ka gjetur një gëzhojë.
“Në vendin e ngjarjes është gjete një gëzhojë ndërsa të dyshuarit janë intervistuar –kontrolluar dhe nuk është gjetur asgjë e dyshuar”, ka njoftuar Policia e Kosovës.
Me vendim të prokurorit, rasti ndodhet në proces të hetimit.
