Rusia dhe Kina planifikojnë ndërtimin e një termocentrali bërthamor në Hënë
Kreu i agjencisë hapësinore të Rusisë ka thënë se Moska dhe Pekini po mendojnë seriozisht për vendosjen e një centrali bërthamor në Hënë.
Kjo mund të ndodhë midis 2033 dhe 2035, tha Yuri Borisov, shkruan Sky News.
Rusia dhe Kina kanë punuar së bashku në një program dhe shpresojnë se projekti një ditë do të lejojë ndërtimin e vendbanimeve në Hënë.
“Sot ne po shqyrtojmë seriozisht një projekt – diku në fund të viteve 2033-2035 – për të ofruar dhe instaluar një njësi energjie në sipërfaqen hënore së bashku me kolegët tanë kinezë,” theksoi Borisov.
Ai shpjegoi se panelet diellore nuk do të jenë në gjendje të sigurojnë energji elektrike të mjaftueshme për të furnizuar vendbanimet e ardhshme hënore, ndërkohë që energjia bërthamore mund.
“Kjo është një sfidë shumë serioze… duhet të bëhet në mënyrë automatike, pa praninë e njerëzve,” tha ai për planin e mundshëm.
Borisov diskutoi gjithashtu planet ruse për të ndërtuar një anije kozmike mallrash me energji bërthamore.
Misioni i parë rus në hënë në 47 vjet dështoi vitin e kaluar pasi anija kozmike Luna-25 doli jashtë kontrollit dhe u rrëzua.
Ndërkohë Kina muajin e kaluar deklaroi se synonte të vendoste astronautin e parë kinez në Hënë përpara vitit 2030.
GJNP-ja lëshon fletarrestime për dy komandantë të lartë rusë
Gjykata Ndërkombëtare Penale (GJNP) njoftoi të martën se ka lëshuar fletarrestime për dy komandantë të lartë rusë, Sergei Kobylash dhe Viktor Sokolov, nën dyshimin se kanë kryer krime lufte në Ukrainë.
GJNP-ja, me bazë në Hagë, tha se ka arsye të forta për të besuar se dy të dyshuarit janë përgjegjës për “sulme raketore të kryera nga forcat e udhëhequra nën komandën e tyre kundër infrastrukturës elektrike të Ukrainës nga së paku 10 tetori 2022 deri më së paku 9 mars 2023”.
Kjo është vala e dytë e fletarrestimeve për arrestimin e zyrtarëve rusë në lidhje me luftën në Ukrainë.
Në mars të vitit të kaluar, GJNP-ja lëshoi fletarrestime për presidentin e Rusisë, Vladimir Putin, dhe për komisionaren e të drejtave të fëmijëve në Rusi, Maria Lvova-Belova, të akuzuar për krime lufte në lidhje me rrëmbimin e fëmijëve ukrainas.
Kremlini i ka mohuar këto akuza.
GJNP-ja tha të martën se sulmet ndaj rrjetit elektrik të Ukrainës u shkaktuan civilëve dëme të mëdha.
Kolyash, gjenerallejtënant, është komandant i Aviacionit me Rreze të Gjata Veprimit të Forcës Ajrore të Rusisë. Sokolov është admiral dhe ish-komandant i Flotës së Rusisë në Detin e Zi.
Prokurorët ukrainas e kanë nisur kohë më parë një hetim ndaj dyshimeve për krime lufte, pas një fushate të sulmeve ajrore ruse gjatë dimrit në infrastrukturën energjetike të Ukrainës.
Rusia e mohon se e vë në shenjë qëllimisht infrastrukturën civile në Ukrainë, duke pretenduar se sulmet e saj kanë për qëllim t’ia kufizojnë Kievit aftësitë për të luftuar./REL
Shtatë të vrarë dhe gjashtë të plagosur nga goditja dhe fundosja e anijes ruse
Nga inteligjenca ukrainase është bërë e ditur se shtatë persona janë vrarë dhe gjashtë tjerë janë lënduar në anijen patrulluese të ushtrisë ruse, e cila u godit dhe u fundos në një sulm me dron në det.
Siç raporton BBC, Sergei Kotov pretendohet se është goditur në orët e para të mëngjesit të sotëm.
Inteligjenca ushtarake e Ukrainës ka njoftuar se anija e flotës ruse në Det të Zi, është dëmtuar në të dyja anët.
Në anën tjetër Kremlini nuk ka dhënë ndonjë koment, por blogerët rusë kanë konfirmuar fundosjen e Sergei Kotovit.
BBC nuk ka mundur në mënyrë të pavarur të verifikojë dëmet e pretenduara në anijen ruse.
Në një postim në Telegram, drejtoria e inteligjencës ushtarake të Ukrainës (HUR), ka njoftuar se 52 anëtarë të ekuipazhit janë evakuuar.
Sergei Kotov është një nga katër anijet patrulluese. Ajo ishte sulmuar edhe në shtator të vitit të kaluar nga ukrainasit.
Sipas ukrainasve, kjo anije ishte pjesë e sulmit rus mbi ishullin Gjarpri në ditën e parë të pushtimit rus në Ukrainë gjatë shkurtit të vitit 2022.
“Perëndimi nuk do ta mposhtë dot Rusinë”, Orban: Zgjidhja e vetme e konfliktit në Ukrainë, negociatat e paqes
Perëndimi nuk do ta mposhtë Rusinë në luftën ‘proxy’ që ka nisur në Ukrainë, deklaroi të hënën kryeministri hungarez Viktor Orban.
“Kjo është një luftë proxy,” tha udhëheqësi hungarez në një fjalim në Dhomën e Tregtisë dhe Industrisë. Sipas Orban, “të gjithë e dinë” se furnizimet për përpjekjet e luftës së Kievit nuk sigurohen nga vetë Ukraina, por “nga ata që qëndrojnë pas saj”.
Duke vënë në dukje se Kievi është plotësisht i varur nga aleatët e tij perëndimorë në luftën kundër Rusisë, Orban tha se është e qartë se “Perëndimi nuk do ta fitojë këtë luftë”.
“Ka vetëm një zgjidhje: negociatat e paqes duhet të fillojnë herët a vonë,” përfundoi Orban, duke shprehur shpresën se një marrëveshje paqeje do të arrihet “herët a vonë” me pjesëmarrjen e SHBA.
Kryeministri hungarez ka thënë se çdo shpresë për t’i dhënë fund konfliktit Ukrainë-Rusi është në duart e SHBA-së, mbështetësit kryesor të Kievit, ndërsa pretendon se vendet perëndimore kanë humbur mundësinë për të arritur një marrëveshje paqeje për Ukrainën.
Rusia monitoron stërvitjen e NATO-s pranë kufirit të saj
Rusia po monitoron stërvitjet e Reagimit Nordik të Organizatës së Traktatit të Atlantikut të Veriut (NATO), të cilat Moska i konsideron si provokuese, tha zëvendësministri i Jashtëm Alexander Grushko.
“Ushtria po monitoron këto stërvitje dhe ka të gjitha mjetet e nevojshme për këtë,” tha Grushko për mediat lokale.
“Ne besojmë se këto ushtrime janë të natyrës demonstrative dhe provokuese”, tha ai, duke shtuar se çdo stërvitje, veçanërisht ato që janë afër vijës së kontaktit, “rrisin rrezikun e incidenteve ushtarake”.
Grushko vuri në dukje se Rusia kishte marrë të gjitha masat e nevojshme për të siguruar aftësitë e saj mbrojtëse në këtë kontekst.
Stërvitja ushtarake e NATO-s Nordic Response 2024 në ajër, tokë dhe det filloi të hënën dhe do të mbahet deri më 14 mars. Stërvitja do të përfshijë mbi 20,000 staf ushtarak nga 13 vende dhe do të zhvillohet në Norvegji, Finlandë dhe Suedi. Dy të fundit janë anëtarë të rinj të NATO-s.
Ukraina nënshkruan marrëveshje me prodhuesit e armëve nga Polonia
Ministria e Mbrojtjes e Ukrainës ka nënshkruar 43 marrëveshje me vlerë pothuajse 750 milionë euro me prodhuesit polakë të armëve, tha kryeministri ukrainas Denys Shmyhal .
“749 milionë euro është vlera e kontratave të lidhura nga Ministria e Mbrojtjes e Ukrainës me kompanitë polake të prodhimit të armëve.
Janë lidhur 43 kontrata. Pjesa më e madhe e kësaj shume është paguar paraprakisht për prodhuesit polakë,” u tha Shmyhal gazetarëve në një konferencë për shtyp.
Në të njëjtën kohë, Shmyhal nuk specifikoi se për çfarë lloj armësh parashikoheshin në kontratat që ai përmendi.
Shmyhal: Ukraina ka nevojë për 37 miliardë dollarë ndihmë këtë vit
Në vitin 2024, Ukrainës i duhen të paktën 37 miliardë dollarë ndihmë financiare, tha kryeministri i vendit Denys Shmyhal gjatë një konference për shtyp.
“Gjatë dy viteve të fundit të luftës së plotë, ne kemi tërhequr mbi 75 miliardë dollarë ndihmë të jashtme. Në fakt, ne po shpenzojmë vetëm burimet tona të brendshme për nevojat e sigurisë së mbrojtjes,” tha ai.
Ai tha se Bashkimi Evropian, Shtetet e Bashkuara, FMN, Japonia, Kanadaja dhe shtetet e tjera anëtare të G7 janë donatorët kryesorë të ndihmës direkte buxhetore.
“Ne tërhoqëm pothuajse 37 miliardë dollarë në 2022. Në vitin 2023, ne tërhoqëm mbi 42 miliardë dollarë. Plani për këtë vit është të tërheqim të paktën 37 miliardë dollarë ndihmë nga partnerët tanë,” tha Shmyhal.
Ai tha se deficiti buxhetor i Ukrainës këtë vit tejkalon 20% të PBB-së së Ukrainës – 37 miliardë dollarë.
Ukraina pret të marrë 17.3 miliardë dollarë nga mekanizmat e Ukraina Facilities të BE-së. Tashmë në mars, Ukraina pret financimin e parë prej 4.5 miliardë euro përpara ratifikimit të Lehtësirave të Ukrainës për të mbuluar deficitin buxhetor.
