Pasi triumfoi këtë vit në botërorin e Formula 2, piloti 21-vjeçar gjerman Mick Schumacher do të garojë sezonin e ardhshëm në Formula 1 me makinën Haas.
Ai është djali i legjendës Michael Schumacher, 7 herë kampion bote në F1, ndaj prania në pistë e Mick shihet me shumë kureshtje nga të gjithë.
Në një intervistë për “Bild”, Mick Schumacher tha: “E di që ndaj meje do të ketë shumë presion, por nuk e vë re shumë këtë gjë. E dua këtë sport, e pëlqej atë që bëj, ndaj e shoh të lehtë të punoj dhe të realizoj ëndrrat e mia. Për mua është një nder që rikthej në këtë sport mbiemrin Schumacher”.
Piloti i ri gjerman u shpreh se gjatë këtyre muajve do të rishohë të gjitha garat që ka zhvilluar babai i tij, si një pjesë e përgatitjes për debutimin në Formula 1.
“Mendoj se të shohësh garat e vjetra ka kuptim edhe pse ky sport është zhvilluar shumë. Unë nuk do të shoh vetëm ato të babait tim, por edhe ato të viteve të fundit”, tha Mick Schumacher.
