Derisa janë në pritje të vendimit të Gjykatës së Drejtësisë së Bashkimit Evropian, organizatorët e Superligës Evropiane vazhdojnë të punojnë për ndërtimin e një gare që përshtatet me nevojat aktuale dhe është veçanërisht tërheqëse për audiencën e re.
“L’Équipe” ka detajuar bazat e planit të një projekti në kërkim të përhershëm për mbështetje të re dhe, për rrjedhojë, në evolucion të vazhdueshëm.
Barça dhe Real Madridi, pavarësisht dorëheqjes së fundit të Andrea Agnellit si president i Juventusit dhe thashethemeve për një ndarje të mundshme nga klubi italian, janë shumë të vendosur në misionin e tyre për të reformuar mënyrën se si funksionon bota e futbollit.
Siç raporton gazeta franceze dhe konfirmohet nga SPORT, “A22 Sports Management” ka kontaktuar tashmë me 50 klube evropiane nga 12 vende të ndryshme për t’ia shtuar kauzës si mbështetës
. E vetëdijshme se strategjia fillestare përjashtonte skuadrat historike, kompania që promovon Superligën e ka kuptuar se, nëse dëshiron të realizojë projektin, duhet të marrë parasysh të gjitha ligat në kontinent dhe jo vetëm La Liga, Premier League, Seria A, Ligue 1 dhe Bundesliga. Kjo është arsyeja pse organizatorët e këtij projekti janë zgjeruar dhe kanë kërkuar mbështetës në vende si Portugalia, Holanda, Belgjika, Danimarka dhe Skocia.
Objektivi i Joan Laporta dhe Florentino Perez, dy fytyrave të dukshme të Superligës, është shumë i qartë: “klasa e mesme” evropiane nuk mund të lihet jashtë turneut. Aq më pak skuadra historike si Ajax, Benfica, Anderlecht apo Celtic. Dhe formati, padyshim, duhet të bazohet në meritat sportive.
Promovuesit e projektit e kanë kuptuar për një kohë të gjatë se fakti që kishte anëtarë të përhershëm, siç ishte menduar në fillim, nuk ishte i realizueshëm apo i drejtë. Modifikimet në strukturën e kompeticionit kanë ndihmuar klubet nga ligat e niveleve më të ulëta dhe më pak ndikim të interesohen për të.
Muajt e ardhshëm do të jenë vendimtarë për të ardhmen e Superligës. Në pranverë, Gjykata e Drejtësisë së Bashkimit Evropian do të zgjidhë konfliktin e saj me UEFA-n dhe, në rast se vendimi është në favor të interesave të saj, “A22 Sports” do të ekzekutojë ofensivën përfundimtare për të themeluar një turne të tillë, për t’i dhënë fund monopolit të organit të kryesuar nga Aleksander Ceferin dhe të përpiqen të përmbajnë fuqinë e lartë financiare të ekipeve angleze në krahasim me atë të pjesës tjetër të kontinentit.
