Simone Inzaghi komentoi rezultatin e ndeshjes së Ligës së Kampioneve duke komplimentuar paraqitjen e të tijve.
“Ishte fitore shumë e rëndësishme nga pikëpamja kualifikuese.
Ne po luanim kundër një ekipi të mirë. Në fillim nuk gjetëm distancën e duhur, por pas epërsisë kontrolluam mirë lojën.
Më pas pësuam golin e barazimit dhe reaguam, duke fituar me meritë ndaj një skuadre që e dija se do të na shqetësonte.
Kemi marrë 7 pikë, por është një grup i balancuar dhe çdo ndeshje është e rëndësishme.
Tani do të kemi dy ndeshje radhazi jashtë, e dimë që Liga e Kampioneve nuk të fal asgjë”, tha trajneri i Interit, që komentoi edhe sfidën e kthimit në tokën austriake: “Do të jetë shumë e ngjashme me atë të sotmen (djeshmen), është një skuadër që luan kështu për shumë vite. Kanë një larmi të madhe lojtarësh”.
Rikthimi i Sançezit te goli dhe performanca e kilianit për skuadrën ka marrë duartrokitjet e 47-vjeçarit.
“Është shumë i rëndësishëm për të gjithë ne, jam i lumtur dhe ai e meriton për dëshirën që kishte për t’u rikthyer tek Interi.
Në lojën me top dhe pa të është shumë i rëndësishëm, sot (dje) ai luajti një ndeshje të shkëlqyer, por kur futa Turamin më duhej të bëja një zgjedhje. Mes tij dhe Lautaros, përndryshe do të kishte vazhduar pa probleme”.
Komenti i fundit i trajnerit i takoi përballjes së fundjavës me Romën. “Po shkojmë pas dy fitoreve të rëndësishme.
Tani duhet të rikuperojmë energjinë tonë dhe nga nesër (sot) do të fillojmë të mendojmë për Romën, e cila ka lojtarë të rëndësishëm si Lukaku dhe të tjerët. Ne do të përpiqemi të luajmë një ndeshje të madhe para tifozëve tanë”.