Kreshnik Hajrizi mund ta bëj hapin e madh në karrierë në ditët e fundit të afatit kalimtar dimërorë.
Qendërmbrojtësi kosovar prej vitesh po luan me mjaft sukses te Lugano në Zvicër dhe tanimë ka zgjuar interesimin e një skuadre të madhe italiane.
Sampdoria që nuk po kalon një moment të mirë në Serie B ka shprehur interesim për transferimin e reprezentuesit kosovar për ta përforcuar mbrojtjen.
Tuttosport ka raportuar se skuadra e drejtuar nga Andrea Pirlo po pret të largojë një lojtarë në orët e fundit për ta zyrtarizuar afrimin e Hajrizit.
Gjithmonë sipas mediumit italian ka një marrëveshje mes palëve dhe zyrtarizimi mund të ndodhë ditën e fundit më 31 janar.
Hajrizi ka kontratë edhe gjashtë muaj me Luganon dhe po e mirëpret largimin për të bërë një hap para në karrierë, megjithatë Tuttosport nuk ka bërë publike shumën që pritet ta shpenzojë Sampdoria për transferimin e kosovarit.
24-vjeçari këtë edicion ka zhvilluar 22 ndeshje me fanellën e Luganos në të gjitha garat, derisa ka realizuar edhe një gol.
