“Për të krijuar energji nga mbeturinat, duhet të ketë sasi të mëdha mbetjesh. Por Maqedonia nuk e ka këtë, edhe pse duket kështu pasi jemi të shkujdesur dhe hedhim mbeturina gjithandej. Por për të djegur mbeturinat duhet sasi serioze, ato mund të mblidhen nga të gjitha vendgrumbullimet, por edhe kjo nuk mjafton”.
Këtë e tha për “TV Telma” ministrja e re e Mjedisit Jetësor dhe Planifikimit Hapësinor, Kaja Shukova. Ajo bën të ditur se përllogaritja për shërbimin e për mbeturinat do të ndryshojë me ligjin e ri për menaxhimin e mbeturinave.
“Deri më tani kemi paguar për metër katror, pra në bazë të sipërfaqes, që sipas meje dhe ekspertëve është e papërshtatshme, sepse në 100 m2 mund të jetë një banor, që prodhon një sasi të vogël mbetjesh, ndërsa në 50 m2 mund të jetojë një familje me shumë anëtarë që prodhon shumë më tepër mbeturina, dhe matematika është shumë e qartë. Me metodologjinë e re, çmimi i shërbimit do të paguhet në bazë të sasisë së mbeturianve të prodhuara. Dhe kështu shpresojmë që të gjithë të mësojmë të përzgjedhim mbetjet, që të paguajmë më pak, sepse ajo që do të depozitohet në një vendgrumbullim do të jetë gjëja e fundit që do të tarifohet dhe gjithçka tjetër do të përpunohet. Çmimin do ta caktojë Komisioni Rregullativ”, tha Shukova.
Ndërsa në lidhje me ndotjen e ajrit, ajo shtoi se analizat tregojnë se ndotja më e madhe vjen nga amvisëritë.
