43 deputetë të Kuvendit të Kosovës kishin nënshkruar për shfuqizimin e ligjit për Gjykatë Speciale.
Disa prej deputetëve kanë qëndruar “stoikë” nënshkrimit të tyre edhe pas pushimit dimëror, por letra e kryekuvendarit, Kadri Veseli ka shkaktuar “lëkundje” të nënshkrimit të tyre.
Deputetë të PDK-së, të cilët të premten e 22 dhjetorit kishin nënshkruar për shfuqizimin e ligjit për Gjykatë Speciale, tashmë thonë se në rast se iu kërkohet nga partia atëherë do të bëjnë tërheqjen e nënshkrimeve të tyre.
Mirëpo, ndryshe prej deputetëve të PDK-së, deputetët e Nisma për Kosovën, qëndrojnë përsëri kundër Gjykatës Speciale.
Ata nuk kanë ndryshuar qëndrim përkundër letrës së shefit të PDK-së, i cili në kolumnën e tij ka treguar qëndrimin e tij për Gjykatë Speciale.
Gjashtë deputetë nga Nisma për Kosovën (Milaim Zeka, Enver Hoti, Alulena Balaj- Halimaj, Zafir Berisha, Haxhi Shala) kanë dhënë nënshkrimin e tyre për shfuqizimin e Gjykatës Speciale.
Deputeti nga radhët e Nisma për Kosovën, Enver Hoti, ka thënë për “Bota sot” se ata kanë qenë dhe janë kundër Gjykatës Speciale dhe ndryshimi i qëndrimit të Veselit nuk është risi.
“Nisma ka qëne dhe është kundër Gjykatës Speciale dhe ashtu do të jetë. Nuk dua të komentoj për letrën e Kadri Veselit, mirëpo ndryshimi i tij nuk është risi pasi që ata vazhdimisht ndryshojnë”, ka pohuar Hoti.