Deputeti nga radhët e Lidhjes Demokratike të Kosovës, Haxhi Avdyli në një prononcim për gazetën ‘’Bota sot’’, thotë se Qeveria e koalicionit PANA-Lista Serbe nuk mundet ta luftojë krimin e organizuar dhe korrupsionin pasi që i bie ta luftojnë vetveten.
‘’Kjo qeveri e ka të vështirë ta luftoj vetveten sepse në esencë vatra e korrupsionit , nepotizmit dhe keqpërdorimit të parasë publike ndodhet në këtë Qeveri’’, potencoi Avdyli.
Deputeti theksoi se kjo qeveri është vatër e familjarëve dhe farefisit duke punësuar mbi 70 zëvendës ministra.
‘’Qeveri e familjarëve e akrabave me mbi 70 zv ministra ku ndjesia e përgjegjësisë për paranë publike ka humbur që nga dita e parë e saj s’ka se si ta luftoj korrupsionin e krimin e organizuar por shumë herë vepron si një organizim i papërgjegjshëm që përfitimet personale e grupore i kanë prioritet dhe aty këtu ndonjë punë pastaj sa për tu dukur që po punojnë diçka’’, ka thënë Avdyli.
