Në përfundim të seancës së sotme plenare në Kuvend janë miratuar dhe dy projektligjet që ishin në rendin e ditës.
Me 96 vota pro dhe asnjë kundër është miratuar projekt-ligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe Kolegjit të Evropës, për hapjen e degës së Kolegjit të Evropës në Tiranë.”
Ndërkohë, është miratuar vetëm me votat e socialistëve, 71 vota pro dhe 27 kundër, projekt-ligji “ Për disa shtesa dhe ndryshime në ligjin nr. 107/2016, “Për prefektin e qarkut”.
Këto ndryshime i shtojnë kompetencat prefektit, pasi tashmë ai do të kontrollojë aktet e Këshillit Bashkiak. Opozita e ka kundërshtuar këtë projekt-ligj, pasi e ka konsideruar si marrje kompetencash të pushtetit bashkiak.
Ndërkohë, Flamur Noka tha gjatë seancës së sotme se përmes këtyre ndryshimeve, kryeministri Edi Rama kërkon të mbajë nën kontroll dhe presion kryetarët e bashkive.
Ndërkohë projektligji për karrierën ushtarake, që synon të plotësojë vakancat në ushtri dhe të ulë moshën mesatare të forcave të armatosura, u miratua me 72 vota pro. Po kaq vota mori dhe projektligji për përkthyesit zyrtare, ku opozita edhe në këtë pikë të rendit të ditës ngriti kartonët e kuq.
