Sistemi shëndetësor ka mungesa të theksuara të mjekëve specialistë, por edhe me hapjen e specializizimet është konstatuar nga drejtuesit e Universitetit të Mjekësisë se vitet e fundit më pak të interesuar për studimet pas universitare duke e bërë më shqetësuese situatën.
Rektori i Universitetit të Mjekësisë Arben Gjata tha se numri i mjekëve të larguar nga Shqipëria është i barabartë më numrin e atyre që diplomohen.
Gjata: Është vënë re sivjet një ulje relative e numrit të kandidatëve për specializime pas universitare. Kjo lidhet edhe me numrin e madh të mjekëve që kanë emigruar dy vitet e fundit nga Shqipëria drejt vendeve të tjera. Do të përbëjë shumë shpejt një problem të rëndësishëm për sistemin shëndetësor shqiptar pasi numri i atyre që largohen këto dy vitet e fundit është gati i njëjtë me numrin e mjekëve të rinj që prodhon universiteti.
Universiteti i Mjekësisë ka shpallur rregulloren për specializimet. Për 180 kuota ka 320 aplikime dhe intervistat do të kryen duke nisur nga data 9 janar i 2017. Për pranimet për specializimet, sipas rektori Gjata është bërë një tolerim me kusht për sa i takon nivelit të gjuhës angleze.
Gjata: Ne mund të ndodheshim para një fakti që të kishim një numër shumë të ulët të kishin nivelin C1. Senati akademik e mori parasysh këtë dhe e ulëm nivelin nga C1 në B2. Ky është vitit i parë që e gjithë procedura e specializimeve hartohen dhe ndiqet nga universiteti i mjekësisë sipas ligjit të arsimit të lartë për autonominë universitare.
