Gjykata Speciale mund të rrëzojë qeverinë aktuale, mund të marr si të akuzuar disa pushtetarë, e të cilët duhet të dorëhiqen. Kësisoj mund të ndodhin ndryshime të mëdha në qeverisjen e tanishme.
Por publicisti dhe njohësi i çështjeve politike, Idriz Zeqiraj thotë se kjo qeveri me doemos duhet të dorëhiqet. Ai duke folur për pushtetarët thotë se Presidenti Ibrahim Rugova kishte informacione për veprimtarinë e Hashim Thaçit, Ramush Haradinajt e Kadri Veseli, andaj iu vuri kryq ngritjes në pushtet të tyre.
“Presidenti Rugova kishte informacion të saktë se Hashim Thaçi ka hyrë në ingranazhin e shërbimeve sekrete të huaja. Prandaj i vuri kryq ngritjes së tij në pushtet. E njëjta gjë vlen sot për kryeparlametarin Veseli dhe kryeministrin aktual Haradinaj. Kryeministri aksidental, i akuzuari bazik për krimet serike, përgjakjen e Rrafshit të Dukagjinit, me bandat e tij, tashmë, është peng i krimeve. Rrjedhimisht, nëse ai, dikur, ishte shef i bandave, tani është rob i tyre, andaj edhe i kalaveshon me poste njerëzit me të kaluar kriminale”, thotë publicisti Zeqiraj.
Ai thotë më tutje se tashmë ka shumë fakte që dëshmojnë për konspiracionin e kryeministri Ramush Haradinaj me Serbinë.
“Qëndrimi në "burgun" hotel, në Colmar të Francës, akuza dhe lirimii tij nga Franca, në koordinim me Serbinë; Votimi i "Listës serbe" për atë dhe qeverinë e tij; lavdërimi i një gjenerali serb, kojshi i Ramushit, për luftën kundër serbëve; votimi me postë në grup dhe komandë nga serbët dhe malazezët, në Serbi e Mal të Zi, për partinë e tij, AAK-në, në zgjedhjet lokale në Komunën e Istogut, janë shumë domëthënëse dhe ngjallin dyshimin e bazuar të konspiracionit të kryeministrit me Serbinë. Edhe pse opozita ka kërkuar shpjegim e transparencë, për marrëveshjet e mundshme, kryeministri "e ka bërë veshin e shurdhër", thotë Zeqiraj./Bota sot