Klaus Gjasula do të jetë përsëri pjesë e Bundesligës së Gjermanisë. Mesfushori siguroi ngjitjen në elitë me Darmshtadtin, ku ka kaluar dy sezone mjaft pozitive pas largimit nga Hamburgu.
“Gladiatori” shqiptar i është kthyer sërish periudhës kur ishte pjesë e Hamburgut, me të cilët gjërat nuk i shkuan ashtu siç i kishte planifikuar. Në intervistë me “Kicker”, Gjasula bën autokritikë dhe fajëson veten për sezonin e dobët që kaloi me klubin e njohur gjerman.
“Unë tashmë mund ta klasifikoj si duhet vitin tim në Hamburg.
Nuk kam qenë preja e askujt dhe as më kanë bërë padrejtësi.
Kështu është në një klub si Hamburgu, nëse nuk funksionon menjëherë, rrallë të jepet një shans i dytë.
Do të doja të kisha rastin të rregulloja sezonin e parë. Por unë gjithashtu e di se ka lojtarë të tjerë që kanë pasur një përvojë të ngjashme.
Jam plotësisht i lumtur që erdha në Darmshtadt. Ndryshe nuk do i kisha përjetuar këto dy vitet e fundit të bujshme”, ka thënë Klaus Gjasula.
