Telashe për presidentin e Napolit, Aurelio De Laurentiis.
Prokuroria e Romës ka hapur një hetim ndaj tij, pikërisht për çështje të lidhura me klubin kampion në fuqi të Italisë.
Gjithçka lidhet me blerjen e Osimhen nga Lille, teksa De Laurentiis akuzohet se ka realizuar plusvalenca fiktive në operacionin e transferimit të tij, duke manipuluar kështu bilancin.
Hetimi i transferimit të Osimhen po bëhet edhe nga prokuroria sportive, megjithatë, duke qenë se bëhet fjalë për bilancin e një shoqërie tregtare si klubi i Napolit, në lojë ka hyrë edhe prokuroria e kryeqytetit.
Natyrisht një situatë jo e mirë kjo për Napolin, që edhe në fushën e lojës nuk po arrin rezultatet e dëshiruara, teksa pas vetëm 5 javësh kampionat, e sheh veten 7 pikë larg kreut.