VMRO-DPMNE propozon ndryshime në Ligjin për akciza, gjegjësisht kërkon që të kthehet tarifa e vjetër e akcizës së naftës.Nga opozita kërkojnë që akciza e naftës të ulet nga 15.121 denarë në 12.121 denarë për litër, për tre denarë kërkojnë që të ulet edhe çmimi i akcizës së naftës, e cila shfrytëzohet për ngrohje. Edhe pse qeveria tentoi që rritjen e akcizës ta justifikojë me mbrojtje të ambientit jetësor, sipas opozitës, rritja e çmimit të akcizës ndikoi negativisht në buxhetin familjar të qytetarëve, kurse ndotja e ajrit vazhdon të jetë alarmante.
“Me rritjen e akcizës u rritën edhe çmimet e derivateve për 30%, ndërsa me këtë u shtuan shpenzimet e qytetarëve. Vetë rritja e akcizës kishte ndikim në rritjen e shërbimeve tjera të transportit, të cilat ndikojnë drejtpërdrejt te qytetarët. Jo vetëm qytetarëve, akciza do t’u kushtojë edhe transportuesit dhe afaristëve dhe do të ndikojë në të gjitha segmenten e jetesës në Maqedoni”,- deklaroi deputeti i VMRO-DPMNE-së, Nikolla Micevski. Por, ky propozim është i papranueshëm për qeverinë.
Zëvendësministrja e financave, Shirete Elezi, theksoi se ulja e çmimit të akcizës së naftës do të ndikojë në të hyrat e buxhetit si dhe do të shkaktojë rritje të ndotjes së ajrit. Ndërsa rritja e çmimit të derivateve të naftës, për Elezin, është si shkak i zhvillimeve në bursat botërore dhe nuk ka lidhje me rritje të akcizës së naftës.
“Duhet të kihet parasysh se rritja e akcizës për 3 denarë paraqet rreth 6% nga çmimi i naftës, që është shumë më e ulët se sa shuma që thoni ju. Në rritjen e përgjithshme të çmimit të naftës, ndikim më të madh kanë zhvillimet aktuale në bursat botërore, siç është çmimi i naftës, i cili po lëviz në një linjë të lartë dhe pavarësisht nga kjo, inflacioni në RM mbetet i ulët dhe stabil, i cili në nivel vjetor dhe në tre muajt e vitit 2018 është 1.5%”,- tha zëvendësministrja e financave, Shirete Elezi.
Pas deklarimit të Ministrisë së Financave lidhur me këtë propozim, VMRO-DPMNE akuzoi qeverinë se nuk di të menaxhojë me të hyrat e buxhetit dhe po zbraz xhepin e qytetarëve. Qeveria i rikujtoi opozitës se në kohën kur ata ishin në pushtet, vendi ka hyrë në borxhe të mëdha vetëm për të mbushur nevojat buxhetore.
