Profesori dhe eksperti amerikan për politikën dhe çështjet e Ballkanit në Universitetin e Nju Jorkut, Alon Ben-Meir, nuk e ka përjashtuar mundësinë që të ketë përleshje të reja mes Kosovës dhe Serbisë.
Duke komentuar paralajmërimet e krerëve të shtetit të Kosovës për sulme të reja nga Serbia, pas atij të 24 shtatorit, Ben-Meir ka thënë se tensionet mes të dyja vendeve nuk janë zvogëluar.
“Nuk ka dyshim se tensioni mes Serbisë dhe Kosovës nuk është zvogëluar pavarësisht përpjekjeve të vazhdueshme të BE-së për të zbutur çështjet e ndryshme konfliktuale midis dy palëve. Megjithëse nuk mund të përjashtohet mundësia që mund të ketë disa përleshje, megjithatë dyshoj se do të ketë ndonjë sulm të madh nga Serbia, sepse kjo thjesht nuk do t'i shërbejë interesave të saj dhe gjithashtu, sepse ajo e di shumë mirë se BE-ja nuk do të heshtë nëse një sulm i tillë duhet të ndodhë”, ka deklaruar eksperti për gazetën “Bota sot”.
Ai ka treguar se si do të veprojë presidenti serb Aleksandar Vuçiq, për të mbetur i favorizuari i Vladimir Putinit.
“Thënë kështu, presidenti Vuçiq, i cili sapo ka fituar një të ashtuquajtur 'fitore dërrmuese', do të vazhdojë të ushtojë shpatën e tij, sepse ai mendon se duke e bërë këtë, Putini do ta shikojë atë në mënyrë të favorshme pa marrë domosdoshmërisht një rrezik të madh”, ka nënvizuar Ben-Meir.
Ai në fund ka porositur BE-në që vazhdojë përpjekjet për të zgjidhur mospajtimet Kosovë-Serbi, edhe për shkak për të shfrytëzuar momentin që presidenti amerikan Joe Biden është ende në pushtet.
“Duke thënë të gjitha këto, BE-ja nuk duhet të dekurajohet nga vazhdimi i përpjekjeve të saj për të pajtuar hap pas hapi dallimet ndërmjet Kosovës dhe Serbisë, veçanërisht për shkak se demokratët janë ende në pushtet në Shtetet e Bashkuara, dhe Biden është shumë më i përkushtuar ndaj pavarësisë së Kosovës dhe sigurisë së Trumpit, se ai do të kthehet në pushtet”, ka thënë Alon Ben-Meir.
Presidentja Vjosa Osmani, ka thënë se alarmet për sulme të reja nga Serbia, duhet të merren seriozisht.
“Të gjitha informatat që ne i kemi është se Serbia po planifikon sulme të reja. Unë do t’i informoj të gjithë liderët evropianë për informatat që institucionet tona të sigurisë së bashku me partnerët i kanë mbledhur në këtë drejtim, sepse këto janë alarme të cilat të gjithë ne së bashku duhet t’i marrim shumë seriozisht dhe të veprojmë si preventivë në mënyrë që Serbia të mos lejohet më ta destabilizojë rajonin tonë”, ka thënë Osmani.
Edhe kryeministri Albin Kurti, ka folur për mundësinë e sulmeve të reja nga Serbia, duke treguar se grupi i Milan Radojiçiqit po vazhdon të riorganizohet në Serbi dhe se i njëjti po planifikon sulme të reja në Kosovë.
“Trajnimet drejtohen nga ushtarakë të pensionuar serbë, të cilët kanë grada të larta si gjeneralë, kolonelë e nënkolonelë dhe të cilët kanë njohuri për Kosovën, të cilët mbase kanë shërbyer në ushtri edhe gjatë kohës së fundit në Kosovë. Ushtrimet janë duke i kryer për vendosjen e minave anti-tank në kushte dimërore dhe për snajper.
Radoiçiq po vazhdon përgatitjet për sulme të reja ndaj Kosovës, po mban takime sekrete në BIA. Pjesëtarë terroristë po paguhen nga dy mijë euro, ata po strehohen në objektet e tij. Planet për sulme tentojnë destabilizimin e vendit tonë. Në vend se t’i dorëzojë terroristët, Serbia po shfrytëzon ata për sulme të reja. Terrorizimi është sfidë për ne, por nuk do të triumfojë”, ka thënë Kurti.
Ndërsa, sipas ministrit të Mbrojtjes, Ejup Maqedonci, tri brigada serbe janë të vendosura përgjatë kufirit me Kosovën./Botasot
