Operatori i Shpërndarjes së Energjisë Elektrike është detyruar që të blejë mbi 7 mln euro energji elektrike për pjesën e dytë të muajit nëntor. Kjo situtatë ka ardhur si rezultat i mungesës së reshjeve kohët e fundit çka ka ndikuar direkt në rezervën ujore të heceve dhe në prodhimin e energjisë elektrike.
Moti i thatë gjatë vjeshtës ka ulur ndjeshëm prodhimin e energjisë elektrike. Kjo ka detyruar OSHEE që të importojë mbi 7 mln euro energji elektrike për të plotësur nevojat e vendit për periudhën 16-30 nëntor.
Çmimi mesatar me të cilin është blerë energjia për nëntorin është rreth 92.25 euro për megavat ndërsa mësohet se ka pasur vështirësi për realizimin e blerjes së energjisë pasi janë zhvilluar disa faza negociatash dhe blerja është siguruar nga 6 kompani.
Për të plotësuar nevojat në një kohë që rezervat hidrike në kaskadën e Drinit kanë qenë në minimum OSHEE bleu rreth 9 mln euro energji elektrike edhe gjatë tetorit duke e çuar vlerën në 16 mln euro në vetëm dy muaj.
Nga të dhënat e Korporatës Elektorenergjetike Shqiptare rezulton një ulje e ndjeshme e rezervës energjetike në raport me muajt e mëparshëm.
Aktualisht ky tregues është 420 GWh, ndërkohë që në muajin gusht ishte 986 GWh.
Shqipëria është e varur direkt nga prodhimi i energjisë hidrike duke u kthyer në një barrë për buxhetin e shtetit, i cili detyrohet të financojë blerjen e energjisë në periudha kritike.
E megjithatë parashikimet e motit për ditët në vijim mbeten optimiste pasi priten reshje në të gjithë territorin.