Ushtria sudaneze ka bërë të ditur se diplomatët dhe shtetasit e ShBA-së, Britanisë së Madhe, Francës e Kinës do të evakuohen nga Sudani nëpërmjet rrugës ajrore, teksa luftimet po vazhdojnë.
Kreu i ushtrisë, Fattah al-Burhan, tha se ata do ta lehtësojnë dhe do ta sigurojnë evakuimin gjatë orëve të ardhshme.
Për evaukimin e shtetasve të huaj, ka pasur edhe plane të mëhershme por ato nuk janë zbatuar për shkaqe sigurie, shkruan BBC.
Arabia Saudite ka njoftuar gjithashtu se po organizon evakuimin e qytetarëve sauditë dhe shtetasve të vendeve “vëllazërore”. Ushtria sudaneze tha se misioni diplomatik i Arabisë Saudite tashmë ishte evakuuar.
Konflikti ka hyrë në javën e dytë, pavarësisht se të dyja palët – ushtria dhe Forcat e Mbështetjes së Shpejtë – ranë dakord për një armëpushim tre-ditor për të shënuar festën myslimane të Fitër Bajramit, duke filluar nga e premtja.
