Zyrtari i Lidhjes Demokratike të Kosovës, Bajram Gecaj, kishte paralajmëruar se trofeu real për PSD-në, do të jetë vendimi i Gjykatës Kushtetuese për zgjedhjet në Komunën e Prishtinës, që sipas tij, do të publikohet në favor të Shpend Ahmetit.
Ndërsa, pas vendimit që doli në favor të Shpend Ahmetit, Gecaj thotë se tani është radha e Prokurorisë të hetojë dhe të sqarojë në detaje akuzat e mediave se në rastin në fjalë ishin bërë pazare në relacionin Ahmeti (PSD)-PANA-Gjykata Kushtetuese, përcjell “Bota sot”.
Kujtojmë se vendimi i Gjykatës Kushtetuese ka dalë në favor të Shpend Ahmetit, ku vendoset se ai mbetet kryetar i Komunës së Prishtinës dhe se nuk do të ketë zgjedhje në Prishtinë, ashtu siç kishte kërkuar kundërshtari i tij nga LDK-ja, Arban Abrashi.
Ja postimi i tij në Facebook:
UA THASHË NË MËNGJES!
Të gjitha mediet po lajmërojnë këtë pasdite se Gjykata Kushtetuese paska marrë vendim në favor të Shpend Ahmetit.
Unë për veten time këtë mundësi e paralajmërova që në mëngjes.
Tani është radha e Prokurorisë së Shteti të hetojë dhe të sqarojë në detaje akuzat e mediave se në rastin në fjalë ishin bërë pazare në relacionin Ahmeti(PSD)-PANA-Gjykata Kushtetuese! Nëse këto akuza dalin të jenë të vërteta, atëherë vaj halli për ne - kapja e shtetit përfundimisht e përmbyllë qarkun vicioz!
