Sot në Gjakovë shumë qytetarë kanë dalë të protestojnë kundër ardhjes së pelegrinëve serbë në Kishën ortodokse të këtij qyteti.
Në mesin e protestuesve janë edhe nënat gjakovare nga shoqata “Thirrjet e Nënave” që kërkojnë zbardhjen e fatit të bijve dhe bijave të tyre të zhdukur në luftën e fundit.
Pas kësaj proteste, Këshilltari i Behgjet Pacollit, ministrit të Punëve të Jashtme në detyrë, Jetlir Zyberaj thotë se sot nuk do të ketë kurrfarë pelegrinazhi në Gjakovë, pasi një gjë e tillë nuk është kërkuar nga institucionet e Kosovës.
Sipas tij, asnjë kriminel nuk do të jetë asnjëherë pjesë e grupit të pelegrinëve serbë, pasi vendi i tyre do të jetë në burg.
“Të gjithë kriminelët serbë që kanë kryer krimet më ç’njerëzore që nga lufta e dytë botërore duhet të dalin para drejtësisë”, shkruan Zyberaj, transmeton gazeta “Bota sot”.
“Sot, nuk do të ketë kurrfarë pelegrinazhi në Gjakovë, sepse një gjë e tillë nuk është kërkuar nga institucionet e Kosovës. Nuk ka asnjë kerkesë zyrtare për këtë dhe rrjedhimisht nuk ka asgjë të planifikuar.
Bashkëndjejmë me shqetësimet e nënave dhe qytetarëve të Gjakovës, por i garantojmë të gjithë që asnjë kriminel nuk do të jetë asnjëherë pjesë e grupit të pelegrinëvë serbë sepse vendi i tyre do të jetë në burg.
Të gjithë kriminelët serbë që kanë kryer krimet më ç’njerëzore që nga lufta e dytë botërore duhet të dalin para drejtësisë”, shkruan ai.