Aktuale

Publikohet aktakuza e plotë kundër Gucatit e Haradinajt, ja për çka akuzohen ata

Më: 15 dhjetor 2020 Në ora: 11:20

Gjykata Speciale e ka konfirmuar të hënën aktakuzën kundër dy krerëve të Organizatës së Veteranëve të Ushtrisë Çlirimtare të Kosovës, Hysni Gucatit e Nasim Haradinajt.

Specialja e akuzon kryetarin dhe nënkryetarin e veteranëve të luftës se përmendën emra të personave që kishin bashkëpunuar me Task Forcën Hetimore Speciale (TFHS), e cila kishte ka kryer hetime penale për pretendimet që përmbante Raporti i Asamblesë Parlamentare të Këshillit të Evropës (APKE), i vitit 2011, me titull “Trajtimi çnjerëzor i personave dhe trafikimi i paligjshëm i organeve njerëzore në Kosovë”.

Aktakuzë e redaktuar

Zyra e Prokurorit të Specializuar

Xhek Smith

Prokurori i Specializuar, në përputhje me kompetencën e tij në bazë të neneve 35(2)(i) dhe 38 të Ligjit nr. 05/L-053 për Dhomat e Specializuara dhe Zyrën e Prokurorit të Specializuar (“Ligji”) akuzon:

HYSNI GUCATIN

NASIM HARADINAJN

për vepra penale kundër administrimit të drejtësisë dhe administratës publike dhe vepra penale kundër rendit publik, të ndëshkueshme në bazë të Kapitujve II, XXXI, dhe XXXII të Kodit Penal të Republikës së Kosovës nr.06/L-074 (2019) (‘KPK’) dhe neneve 15(2) dhe 16(3) të Ligjit, sikurse shtjellohet në vijim.

TË AKUZUARIT

1. Hysni GUCATI, emri i babait [REDAKTUAR], u lind më 30 mars 1967 në Morinë, komuna e Skënderajt, Kosovë. Adresa e fundit e njohur e tij është [REDAKTUAR], Kosovë. Ai ka shtetësinë kosovare (numri personal [REDAKTUAR]). 2. Nasim HARADINAJ, emri i babait [REDAKTUAR], u lind më 21 maj 1963 në Gllogjan, komuna e Deçanit, Kosovë. Adresa e fundit e njohur e tij është [REDAKTUAR], Kosovë. Ai ka shtetësinë kosovare (numri personal [REDAKTUAR]). 3. Në të gjitha periudhat që lidhen me këtë Aktakuzë, Hysni GUCATI ishte kryetar, kurse Nasim HARADINAJ nënkryetar i Organizatës së Veteranëve të Luftës të Ushtrisë Çlirimtare të Kosovës (‘OVL-UÇK’).

PARAQITJE E FAKTEVE

4. Të gjitha veprat penale të paraqitura në këtë Aktakuzë kanë lidhje me procedurat zyrtare të Dhomave të Specializuara (‘DHS’) dhe hetimet e Zyrës së Prokurorit të Specializuar (‘ZPS’) (bashkërisht ‘procedurat e DHS-së’). Të gjitha referencat për dëshmitar ose dëshmitarë në këtë aktakuzë duhet të kuptohen se përfshijnë të gjithë personat që me gjasë kanë informacion për vepra penale, kryes apo rrethana të rëndësishme në lidhje me procedurat e DHS-së.
5. Midis më së paku prillit dhe shtatorit 2020, Hysni GUCATI dhe Nasim HARADINAJ bënë deklarata akuzuese për dëshmitarë që bashkëpunojnë me ZPS-në dhe për persona të tjerë, duke i quajtur ata, ndër të tjera, gënjeshtarë, bashkëpunëtorë dhe tradhtarë. Kjo sjellje tregon qartë synimin dhe motivin e tyre për të dëmtuar dhe penguar procedurat e DHS-së.

6. Sikurse shtjellohet më poshtë, midis më së paku 7 dhe 25 shtatorit 2020, Hysni GUCATI, Nasim HARADINAJ dhe të tjerë, shpërndanë pa autorizim informacion konfidencial dhe jopublik në lidhje me hetimet konfidenciale të Task Forcës Hetimore Speciale (‘TFHS’) dhe ZPS-së, inkurajuan të tjerë të shpërndanin më tej informacion konfidencial dhe jopublik, dhe ndërmorën veprime të tjera për qëllimin e deklaruar të pengimit të punës së DHS-së/ZPS-së. Ky informacion konfidencial dhe jopublik përfshinte dokumente të shënuara si ‘konfidenciale’[REDAKTUAR].

7. Hysni GUCATI dhe Nasim HARADINAJ organizuan dhe bashkërenduan së bashku me disa të tjerë shpërndarjen e paautorizuar të informacionit konfidencial dhe jopublik dhe veprime të tjera në lidhje me të, ndër të tjera përmes këqyrjes së informacionit konfidencial dhe jopublik, pjesëmarrjes në vendime nëse dhe si të shpërndahej ai informacion, dhe organizimit e pjesëmarrjes në ngjarje në lidhje me të, duke përfshirë konferenca për shtyp dhe paraqitje publike në të cilat u shpërnda dhe diskutua publikisht informacion konfidencial dhe jopublik.

Dokumentet e nxjerra gjatë herës së parë

8. Më 7 shtator 2020, Hysni GUCATI dhe Nasim HARADINAJ, përkatësisht në cilësinë e kryetarit dhe nënkryetarit të OVL-UÇK-së, mbajtën një konferencë për shtyp në të cilën Hysni GUCATI njoftoi se OVL-UÇK-ja kishte marrë dosje dokumentesh në lidhje me DHS-në/ZPS-në (‘konferenca e parë për shtyp’). Gjatë konferencës për shtyp, këto dosje (‘dokumentet e nxjerra gjatë herës të parë’) ishin ekspozuar mbi një tavolinë.

9. Nasim HARADINAJ deklaroi se gjatë konferencës së parë për shtyp do të viheshin në dispozicion katër kopje të dokumenteve. Ai përmendi [REDAKTUAR]. Nasim HARADINAJ shpjegoi gjithashtu se dokumentet e nxjerra gjatë herës të parë [REDAKTUAR]. Nasim HARADINAJ pranoi se dokumentet ishin konfidenciale. Ai deklaroi se OVL-UÇK-ja do t’u dërgonte deputetëve të Kuvendit të Kosovës kopje të dokumenteve dhe se të pranishmëve në konferencën e parë për shtyp do t’u jepte sa kopje të dëshironin. Nasim HARADINAJ u bëri thirrje të pranishmëve që të merrnin kopje të dokumenteve dhe t’i shihnin emrat dhe deklaratat e dëshmitarëve.

10. Më 7 shtator 2020, Gjykatësi i Vetëm i DHS-së autorizoi sekuestrimin e dokumenteve që ishin pjesë e dokumenteve të nxjerra gjatë herës të parë, konfirmoi natyrën konfidenciale dhe jopublike të hetimeve të TFHS-së dhe ZPS-së dhe urdhëroi që personat të cilët posedonin dokumentet ose përmbajtjen e tyre, të mos i kopjonin, incizonin ose shpërndanin ato (‘Urdhri i Parë’). Më 8 shtator 2020, ZPS-ja dorëzoi Urdhrin e Parë dhe sekuestroi dokumentet në ambientet e OVL-UÇK-së. Materialet e sekuestruara përfshinin informacion konfidencial dhe jopublik në lidhje me hetimet konfidenciale[REDAKTUAR].

11. Pas konferencës së parë për shtyp, midis 7 dhe 15 shtatorit 2020, Hysni GUCATI dhe Nasim HARADINAJ bënë deklarata të shumta publike lidhur me dokumentet e nxjerra gjatë herës të parë. Në kuadër të atyre deklaratave, Hysni GUCATI dhe/ose Nasim HARADINAJ publikisht:

konfirmuan se përfaqësuesve të shtypit u ishin dhënë kopje të dokumenteve të nxjerra gjatë herës së parë;

zbuluan më shumë nga përmbajtja e dokumenteve të nxjerra gjatë herës së parë, duke përfshirë hollësi të hetimeve konfidenciale;

deklaruan se në dokumentet përmendeshin me emër dëshmitarë, si dhe përmendën datat dhe vendet e kryerjes së disa intervistave;

akuzuan dëshmitarët e përmendur me emër në dokumente se ishin, ndër të tjera, gënjeshtarë, tradhtarë dhe spiunë;

inkurajuan përfaqësues të shtypit që të publikonin dokumentet e përfshira në dokumentet e nxjerra gjatë herës së parë;
deklaruan se nëse do të merrnin informacion konfidencial dhe publik të mëtejmë, do ta shpërndanin publikisht; dhe

deklaruan se nuk e njihnin DHS-në/ZPS-në dhe se veprimet e tyre kishin për qëllim pengimin e DHS-së/ZPS-së.

12.
tej - ndër të tjera në shtyp dhe në Internet - informata me emra dhe të dhëna personale [REDAKTUAR] që përfshiheshin në dokumentet e nxjerra gjatë herës së parë.

Dokumentet e nxjerra gjatë herës së dytë

13. Më 16 shtator 2020, Hysni GUCATI dhe Nasim HARADINAJ, përkatësisht në cilësinë e kryetarit dhe nënkryetarit të OVL-UÇK-së, mbajtën konferencë për shtyp (‘konferenca e dytë për shtyp’) në të cilën Hysni GUCATI deklaroi se OVL-UÇK-ja kishte marrë një paketë tjetër dokumentesh. Ai u tha të pranishmëve se mund t’i merrnin dokumentet (‘dokumentet e nxjerra gjatë herës së dytë’). Ndërsa po tregonte njërin nga dokumentet, Hysni GUCATI përmendi me emër dy persona që kishin bashkëpunuar me TFHS-në.

14. Nasim HARADINAJ përsëriti emrin e një personi që tashmë ishte përmendur nga Hysni GUCATI, përmendi me emër një person tjetër që kishte bashkëpunuar me TFHS-në, dhe zbuloi informacion konfidencial dhe jopublik të mëtejmë në lidhje me hetimet konfidenciale. Nasim HARADINAJ u tha të pranishmëve në konferencën e dytë për shtyp se dokumentet ishin në dispozicion për të gjithë dhe u tha të pranishmëve që t’i merrnin ato.

15. Më 17 shtator 2020, Gjykatësi i Vetëm i DHS-së autorizoi sekuestrimin e dokumenteve që ishin pjesë e dokumenteve të nxjerra gjatë herës së dytë, konfirmoi natyrën konfidenciale dhe jopublike të informacionit nga hetimet e TFHS-së dhe ZPS- së dhe urdhëroi që personat të cilët posedonin dokumentet ose përmbajtjen e tyre të mos i kopjonin, incizonin ose shpërndanin ato (‘Urdhri i Dytë’). Më vonë atë ditë, ZPS-

v. vi. vii.

Pas konferencës së parë për shtyp dhe gjatë ditëve që vijuan, u shpërndanë më

ja dorëzoi Urdhrin e Dytë dhe sekuestroi dokumentet në ambientet e OVL-UÇK-së. Materiali i sekuestruar përfshinte (i) dokumente në lidhje me procedime penale të mëparshme në Kosovë dhe në Tribunalin Penal Ndërkombëtar për ish-Jugosllavinë; dhe (ii) dokumente në lidhje me hetime konfidenciale, të cilat kishin qenë gjithashtu pjesë e dokumenteve të nxjerra gjatë herës së parë dhe përfshinin identitetin dhe/ose të dhënat personale [REDAKTUAR].

16. Pas konferencës së dytë për shtyp, midis 17 dhe 21 shtatorit 2020, Hysni GUCATI, Nasim HARADINAJ dhe të paktën një përfaqësues tjetër i OVL-UÇK-së bënë deklarata të shumta publike në lidhje me dokumentet e nxjerra gjatë herës së parë dhe gjatë herës së dytë. Në kuadër të atyre deklaratave, Hysni GUCATI, Nasim HARADINAJ, dhe/ose një tjetër apo të tjerë, publikisht:

pranuan se dokumentet e nxjerra gjatë herës së parë dhe gjatë herës së dytë kishin përmbajtje të ndjeshme, konfidenciale dhe jopublike;

pranuan se me ligj nuk duhet të publikohen identiteti dhe të dhënat personale të dëshmitarëve;

pretenduan se dokumentet e sekuestruara nga ZPS-ja ishin vetëm një pjesë e dokumenteve të shpërndara gjatë dhe pas konferencës së dytë për shtyp, pasi që përfaqësues të shtypit dhe të tjerë tashmë kishin marrë pjesën tjetër të tyre;

konfirmuan se urdhrat e DHS-së ndalonin shpërndarjen e mëtejshme të përmbajtjes së dokumenteve të nxjerra gjatë herës së parë dhe gjatë herës së dytë;

konfirmuan se dokumentet e nxjerra gjatë herës së dytë u ishin vënë në dispozicion përfaqësuesve të shtypit dhe ishin marrë prej tyre;

zbuluan më shumë nga përmbajtja e dokumenteve të nxjerra gjatë herës së parë dhe gjatë herës së dytë, duke përfshirë hollësi të hetimeve konfidenciale;

konfirmuan se dokumentet e shpërndara përmbanin identitetin dhe të dhëna personale të dëshmitarëve;

akuzuan dëshmitarët e përmendur në informacionin konfidencial se ishin, ndër të tjera, gënjeshtarë, spiunë dhe tradhtarë;

falënderuan dhe lavdëruan personat që i kishin dhënë OVL-UÇK-së dokumentet e nxjerra gjatë herës së dytë;

premtuan se do të publikonin çfarëdo informacioni konfidencial dhe jopublik të mëtejmë qo do t’i jepej OVL-UÇK-së në lidhje me DHS-në/ZPS- në;

sfiduan përfaqësuesit e shtypit që nuk kishin publikuar informacionin konfidencial dhe jopublik;

u thanë përfaqësuesve të shtypit që të publikonin informacionin konfidencial dhe jopublik; dhe

deklaruan se nuk e njihnin DHS-në/ZPS-në dhe se veprimet e tyre kishin për qëllim pengimin e DHS-së/ZPS-së.

Dokumentet e nxjerra gjatë herës së tretë

17. Më 22 shtator 2020, Hysni GUCATI dhe Nasim HARADINAJ, përkatësisht në cilësinë e kryetarit dhe nënkryetarit të OVL-UÇK-së, mbajtën konferencë për shtyp (‘konferenca e tretë për shtyp’) në të cilën Hysni GUCATI deklaroi se OVL-UÇK-ja kishte marrë dokumente që besohej se kishin rrjedhur nga DHS-ja/ZPS-ja (‘dokumentet e nxjerra gjatë herës së tretë’). Hysni GUCATI tregoi njërin prej dokumenteve dhe ftoi të pranishmit që të afroheshin për të parë dokumentin.

18. Nasim HARADINAJ deklaroi se dokumentet kishin stemën e ZPS-së dhe se, me sa kuptonte ai, ishin në lidhje me një projektaktakuzë. Duke iu referuar përmbajtjes së dokumenteve, ai përmendi me emër pesë persona të akuzuar të mundshëm, [REDAKTUAR] dhe identifikoi persona dhe vendndodhje të tjera të përmendura në dokument. Nasim HARADINAJ ftoi të pranishmit që të shihnin, incizonin dhe publikonin përmbajtjen e dokumenteve. Ai gjithashtu deklaroi se OVL-UÇK-ja do të merrte dhe shpërndante informacion të mëtejmë konfidencial dhe jopublik në lidhje me DHS-në/ZPS-në.

19. Më 22 shtator 2020, ZPS-ja nxori një urdhër për dorëzimin e dokumenteve që ishin pjesë e dokumenteve të nxjerra gjatë herës së tretë, dhe që personat që posedonin këto dokumente apo përmbajtjen e tyre, të mos i kopjonin, incizonin ose shpërndanin ato (‘Urdhri i Tretë’). Në të njëjtën ditë, ZPS-ja dorëzoi Urdhrin e Tretë dhe sekuestroi dokumentet në ambientet e OVL-UÇK-së. Materialet e sekuestruara përfshinin informacion konfidencial dhe jopublik në lidhje me hetimet konfidenciale [REDAKTUAR].

20. Pas konferencës së tretë për shtyp, midis 22 dhe 25 shtatorit 2020, Hysni GUCATI dhe Nasim HARADINAJ bënë deklarata të shumta publike në lidhje me dokumentet e nxjerra gjatë herës së tretë. Në kuadër të atyre deklaratave, Hysni GUCATI dhe/ose Nasim HARADINAJ publikisht:

konfirmuan që dokumentet e nxjerra gjatë herës së tretë, iu shpërndanë shtypit;

[REDAKTUAR];

inkurajuan personat që posedonin informacion konfidencial dhe jopublik

në lidhje me DHS-së/ZPS-në, që të vazhdonin t’i jepnin informacion të

tillë OVL-UÇK-së;

premtuan se do të publikonin çfarëdo informacioni konfidencial dhe

jopublik të mëtejmë qo do t’i jepej OVL-UÇK-së në lidhje me DHS-në/ZPS-

së; dhe

deklaruan se nuk e njihnin DHS-në/ZPS-në dhe se veprimet e tyre kishin

për qëllim pengimin e DHS-së/ZPS-së.

21. Pas konferencës së tretë për shtyp dhe gjatë ditëve që vijuan, u shpërndanë më tej - ndër të tjera në shtyp dhe në Internet - informata [REDAKTUAR] që përfshiheshin në dokumentet e nxjerra gjatë herës së tretë.
22. Si pasojë e dokumenteve të nxjerra gjatë herës së parë, të dytë dhe të tretë, si dhe e ngjarjeve në lidhje me to të përshkruara më lart, u frikësuan dëshmitarë dhe/ose anëtarë të familjeve të tyre dhe u vunë në rrezik siguria, privatësia, reputacioni dhe

jetesa e tyre. Për më tepër, ZPS-ja u detyrua të merrte masa për të trajtuar pasojat reale dhe të mundshme ndër të tjera për dëshmitarët dhe procedurat e DHS-së.
23. Dokumentet konfidenciale dhe jopublike që u shpërndanë gjatë herës së parë, të dytë dhe të tretë, në vazhdim do të quhen ‘informacion konfidencial’.

Veprat penale

24. Në bazë të fakteve të paraqitura në paragrafët 4-22, Hysni GUCATI dhe Nasim HARADINAJ mbajnë përgjegjësi penale individuale për çdonjërën nga veprat penale të renditura më poshtë. Sikurse përshkruhet në paragrafët 45-46, ata kishin dijeninë dhe synimin e nevojshëm për çdonjërën nga veprat penale.

Pengimi i personave zyrtarë në kryerjen e detyrave zyrtare

25. Midis më së paku 7 dhe 25 shtatorit 2020, Hysni GUCATI, Nasim HARADINAJ, dhe disa të tjerë (‘ndihmësit’), me anë të kërcënimit të rëndë dhe/ose duke vepruar bashkërisht, penguan ose tentuan të pengonin procedurat e DHS-së. Hysni GUCATI dhe Nasim HARADINAJ organizuan dhe bashkërenduan grupin që kreu veprime të tilla.

26. Në veçanti, sikurse përshkruhet në paragrafët 6-9, 11-14, 16-18, dhe 20-21, në më shumë raste midis më së paku 7 dhe 25 shtatorit 2020, Hysni GUCATI, Nasim HARADINAJ, dhe/ose ndihmësit (i) shpërndanë informacionin konfidencial; (ii) akuzuan dëshmitarët e përmendur në informacionin konfidencial se ishin, ndër të tjera, gënjeshtarë, spiunë dhe tradhtarë; dhe (iii) deklaruan se me shpërndarjen e informacionit konfidencial dhe veprimet e tjera në lidhje me të, ata kishin për qëllim pengimin e procedurave të DHS-së. Hysni GUCATI dhe Nasim HARADINAJ gjithashtu inkurajuan, udhëzuan dhe/ose këshilluan publikisht persona të tjerë, duke përfshirë:

i. disa përfaqësues të publikut që posedonin ose kishin qasje në informacion konfidencial në lidhje me procedurat e DHS-së, që të vazhdonin t’i jepnin informacion të tillë OVL-UÇK-së; dhe

ii. disa përfaqësues të shtypit dhe publikut që të merrnin dhe/ose incizonin dhe shpërndanin e publikonin më tej informacionin konfidencial.

27. Më së paku pas nxjerrjes së parë dhe nxjerrjes së tretë të dokumenteve, një pjesë e informacionit konfidencial u shpërnda më tej, si në shtyp, po ashtu edhe në Internet, sikurse përshkruhet në paragrafët 12 dhe 21.
28. Së fundi, sikurse përshkruhet në paragrafin 22, veprimet e Hysni GUCATIT, Nasim HARADINAJT, dhe/ose të ndihmësve penguan ose tentuan të pengonin procedurat e DHS-së: (i) frikësuan dëshmitarë; (ii) rrezikuan aftësinë e ZPS-së për hetimin dhe ndjekjen penale të efektshme të krimeve, përfshirë nëpërmjet marrjes dhe sigurimit të provave të rëndësishme; dhe (iii) ZPS-ja përqendroi kapacitetet dhe kohën e vet në trajtimin e pasojave reale dhe të mundshme ndër të tjera për dëshmitarët dhe procedurat e DHS-së.

Frikësimi gjatë procedurës penale

29. Midis më së paku 7 dhe 25 shtatorit 2020, Hysni GUCATI, Nasim HARADINAJ dhe ndihmësit përdorën kërcënime të rënda për të nxitur ose për të tentuar të nxisin dëshmitarët që të mos japin deklarata, apo të japin deklarata të rreme, ose ndryshe të mos i japin informacion të vërtetë ZPS-së dhe/ose DHS-së.

30. Në veçanti, sikurse përshkruhet në paragrafët 6-9, 11-14, 16-18, dhe 20-21, në një numër rastesh, Hysni GUCATI, Nasim HARADINAJ, dhe/ose ndihmësit:

[REDAKTUAR];

pranuan që informacioni konfidencial përfshinte emrat dhe të dhënat e

dëshmitarëve të mbrojtur;

gjatë paraqitjeve publike zbuluan identitetin [REDAKTUAR], vendin e

banimit, dhe të dhëna personale dhe/ose hollësi të tjera në lidhje me ta,

duke përfshirë datat dhe vendet ku ishin intervistuar;

i akuzuan dëshmitarët e identifikuar në informacionin konfidencial se

ishin, ndër të tjera, gënjeshtarë, spiunë dhe tradhtarë;

inkurajuan, udhëzuan dhe këshilluan disa përfaqësues të publikut që posedonin informacion konfidencial në lidhje me procedurat e DHS-së, ose kishin qasje në informacion të tillë, që të vazhdonin t’i jepnin informacion të tillë OVL-UÇK-së;

inkurajuan, udhëzuan dhe këshilluan disa përfaqësues të shtypit dhe publikut që të merrnin dhe/ose incizonin dhe më pas shpërndanin dhe publikonin më tej, informacionin konfidencial;

deklaruan dhe me veprimet e tyre demonstruan indiferencën e tyre për sigurinë e dëshmitarëve të identifikuar në informacionin konfidencial; dhe

deklaruan se qëllimi i tyre i shpërndarjes së informacionit konfidencial dhe i veprimeve në lidhje me të, ishte pengimi i procedurave të DHS-së.

Hakmarrja

31. Midis më së paku 7 dhe 25 shtatorit 2020, Hysni GUCATI, Nasim HARADINAJ dhe ndihmësit ndërmorën ose tentuan të ndërmerrnin veprime të dëmshme kundër dëshmitarëve me synimin e hakmarrjes për dhënien ZPS-së të informacionit të besueshëm në lidhje me kryerjen ose kryerjen e mundshme të veprave penale.

32. Në veçanti, veprimet dhe mosveprimet e përshkruara në paragrafin 30 më lart shkelën të drejtat themelore të dëshmitarëve të garantuara në Kushtetutën e Republikës së Kosovës dhe në Konventën Evropiane për Të Drejtat e Njeriut. U frikësuan dëshmitarë dhe/ose anëtarë të familjeve të tyre dhe u vunë në rrezik siguria, privatësia, reputacioni dhe jetesa e tyre.

Shkelja e fshehtësisë së procedurës

33. Sikurse përshkruhet në paragrafët 6-9, 11-14, 16-18, dhe 20-21, midis më së paku 7 dhe 25 shtatorit 2020, Hysni GUCATI, Nasim HARADINAJ dhe ndihmësit zbuluan informacion konfidencial pa autorizim. Ata gjithashtu inkurajuan, udhëzuan dhe këshilluan: (i) disa përfaqësues të publikut që posedonin ose kishin qasje në

informacion konfidencial në lidhje me procedurat e DHS-së, që të vazhdonin t’i jepnin informacion të tillë OVL-UÇK-së; dhe (ii) disa përfaqësues të shtypit dhe publikut që të merrnin dhe/ose incizonin dhe të shpërndanin e publikonin më tej informacionin konfidencial. Informacioni konfidencial nuk duhej të zbulohej në bazë të Ligjit dhe/ose ishte i klasifikuar nga autoritetet kompetente, ndër të tjera nga DHS-ja, TFHS-ja/ZPS- ja, dhe organizatat dhe shtetet bashkëpunuese në bazë të një marrëveshjeje me TFHS- në/ZPS-në. Informacioni ishte i klasifikuar në përputhje me nenet 4(2), 23, 35(2)(d)-(f), 39, 54(8), 61(3)-(4) dhe 62 të Ligjit.

34. Gjithashtu, sikurse përshkruhet në paragrafët 6-9, 11-14, 16-18, dhe 20-21, midis më së paku 7 dhe 25 shtatorit 2020, Hysni GUCATI, Nasim HARADINAJ dhe ndihmësit zbuluan ose tentuan të zbulonin pa autorizim identitetin dhe të dhënat personale të dëshmitarëve të mbrojtur në kontekstin e procedurave të DHS-së dhe procedimeve të tjera penale të mëparshme në Kosovë. Ata gjithashtu inkurajuan, udhëzuan dhe këshilluan përfaqësues të shtypit dhe publikut që të zbulonin pa autorizim informacion të tillë. Hysni GUCATI, Nasim HARADINAJ dhe ndihmësit deklaruan publikisht se informacioni konfidencial përfshinte identitetin, të dhëna personale dhe dëshmi të dëshmitarëve, dhe ishte në lidhje me hetimet konfidenciale të TFHS-së/ZPS-së. Hysni GUCATI, Nasim HARADINAJ dhe ndihmësit pranuan që me ligj, identiteti dhe të dhënat personale të dëshmitarëve nuk duhej të shpërndahen publikisht. Përkundrazi, në përputhje me Ligjin, informacioni konfidencial duhej të ishte zbuluar vetëm në kontekstin e procedimeve penale, në varësi të garancive dhe masave mbrojtëse të nevojshme.

35. Sikurse përshkruhet në paragrafët 22 dhe 32 më lart, zbulimi i paautorizuar i identitetit dhe të dhënave personale të dëshmitarëve të mbrojtur rezultoi në pasoja të rrezikshme për dëshmitarët dhe pengoi rëndë hetimet e ZPS-së.

Format e përgjegjësisë penale

36. Bazuar në faktet e paraqitura në paragrafët 4-22, Hysni GUCATI dhe Nasim HARADINAJ mbajnë përgjegjësi penale individuale për veprat penale të përshkruara

më lart përmes formave të përgjegjësisë penale të renditura në vijim. Sikurse përshkruhet në paragrafët 45-46, ata kishin dijeninë dhe synimin e nevojshëm për secilën formë të përgjegjësisë penale dhe secilën vepër penale.

Kryerja dhe tentimi

37. Hysni GUCATI dhe Nasim HARADINAJ i kryen veprat penale përmes veprimeve dhe mosveprimeve të përshkruara në paragrafët 6-9, 11, 13-14, 16-18, 20. 38. Gjithashtu dhe/ose në alternativë, nëpërmjet veprimeve dhe mosveprimeve të përshkruara në paragrafët 6-9, 11, 13-14, 16-18, 20, Hysni GUCATI dhe Nasim HARADINAJ tentuan, në kuptim të nenit 28 të KPK-së, të kryenin veprat penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës, përmes zbulimit të identitetit dhe të dhënave personale të dëshmitarëve të mbrojtur.

Bashkëkryerja dhe marrëveshja për të kryer vepër penale

39. Sikurse del qartë nga qëllimi i deklaruar i tyre i pengimit të DHS-së/ZPS-së, si dhe nga veprimet e bashkërenduara për realizimin e qëllimit të përbashkët të përshkruara në paragrafët 6-9, 11-14, 16-18, dhe 20-21, Hysni GUCATI, Nasim HARADINAJ dhe/ose ndihmësit i kryen veprat penale bashkërisht dhe/ose ranë në marrëveshje për kryerjen e veprave penale.

40. Hysni GUCATI dhe Nasim HARADINAJ kontribuuan konsiderueshëm dhe ndërmorën veprime të rëndësishme për kryerjen e veprave penale, në realizimin e qëllimit ose marrëveshjes së përbashkët, ndër të tjera nëpërmjet njërës apo më shumë prej mënyrave të mëposhtme, sikurse përshkruhet më hollësisht në paragrafët 6-9, 11, 13-14, 16-18, 20:

i. këqyrjes së informacionit konfidencial;
ii. vendimmarrjes dhe/ose pjesëmarrjes në vendime nëse dhe si të

shpërndahej informacioni konfidencial;

organizimit dhe pjesëmarrjes në ngjarje, duke përfshirë konferenca për shtyp dhe paraqitje publike, në të cilat informacioni konfidencial u shpërnda dhe u diskutua publikisht;

shpërndarjes së informacionit konfidencial;

zbulimit të identitetit dhe të dhënave personale [REDAKTUAR];

akuzave kundër dëshmitarëve dhe komenteve nënçmuese në lidhje me

dëshmitarët;

inkurajimit dhe këshillimit të personave me qasje në informacion

konfidencial në lidhje me procedurat e DHS-së që të vazhdonin t’i jepnin informacion të tillë OVL-UÇK-së, si dhe premtimeve se do të vazhdonin të shpërndanin informacion të tillë konfidencial; dhe/ose

inkurajimit, udhëzimit dhe këshillimit të përfaqësuesve të mediave dhe publikut që të merrnin dhe/ose incizonin informacionin konfidencial dhe ta shpërndanin më tej.

Nxitja

41. Nëpërmjet një apo më shumë veprimeve të përshkruara në paragrafin 40(ii)- (viii), Hysni GUCATI dhe Nasim HARADINAJ nxitën njëri-tjetrin, ndihmësit dhe disa të tjerë, që të kryenin veprat penale të lartpërmendura.
42. Gjithashtu dhe/ose në alternativë, nëpërmjet një apo më shumë veprimeve të përshkruara në paragrafin 40(ii)-(viii), Hysni GUCATI dhe Nasim HARADINAJ: (i) nxitën njëri-tjetrin, ndihmësit, dhe disa të tjerë, që të kryenin veprat penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës; dhe (ii) u tentua kryerja e këtyre veprave penale.

43. Gjithashtu dhe/ose në alternativë, nëpërmjet një apo më shumë veprimeve të përshkruara në paragrafin 40(ii)-(viii), Hysni GUCATI dhe Nasim HARADINAJ: (i) nxitën njëri-tjetrin, ndihmësit, dhe disa të tjerë, që të kryenin veprat penale të pengimit të personave zyrtarë në kryerjen e detyrave zyrtare, frikësimit gjatë

procedurës penale dhe shkeljes së fshehtësisë së procedurës përmes zbulimit të identitetit dhe të dhënave personale të dëshmitarëve të mbrojtur; dhe (ii) vepra të tilla penale nuk u kryen, e as u tentua të kryheshin.

Ndihma

44. Së fundi, nëpërmjet një apo më shumë veprimeve të përshkruara në paragrafin 40, Hysni GUCATI dhe Nasim HARADINAJ ndihmuan njëri-tjetrin, ndihmësit, dhe disa të tjerë, në kryerjen e veprave penale të përshkruara më lart.

Synimi

45. Sikurse del qartë nga sjellja dhe deklaratat e qëllimshme të tyre të përshkruara në paragrafët 5-9, 11-14, 16-18, dhe 20-21, ndër të cilat shpërndarja e informacionit konfidencial, akuzat kundër dëshmitarëve, indiferenca ndaj sigurisë së dëshmitarëve, deklaratat në të cilat pranojnë natyrën konfidenciale të informacionit konfidencial, si dhe qëllimi i deklaruar i pengimit të punës së DHS-së/ZPS-së, Hysni GUCATI, Nasim HARADINAJ, dhe, sipas rastit, ndihmësit dhe persona të tjerë, synuan kryerjen e veprave penale të përshkruara më lart dhe/ose nxitjen e tyre dhe ndihmën në kryerjen e tyre.

46. Në alternativë, sikurse del qartë nga sjellja dhe deklaratat e qëllimshme të tyre, Hysni GUCATI, Nasim HARADINAJ, dhe, sipas rastit, ndihmësit dhe persona të tjerë: (i) ishin të vetëdijshëm se si pasojë e veprimeve ose mosveprimeve të tyre, mund të kryheshin veprat penale të përshkruara më lart, dhe/ose se veprimet apo mosveprimet e tyre mund të nxisnin kryerjen e veprave penale apo të ndihmonin në kryerjen e tyre; dhe (ii) u pajtuan me kryerjen e tyre.

PARAQITJA E VEPRAVE PENALE
47. Nëpërmjet veprimeve dhe mosveprimeve të përshkruara më lart, Hysni

GUCATI dhe Nasim HARADINAJ:

kryen, vetëm dhe/ose bashkë me të tjerë, veprat penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës;

tentuan të kryenin veprat penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës përmes zbulimit të identitetit dhe të dhënave personale të dëshmitarëve të mbrojtur;

u morën vesh që të kryenin veprat penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës, dhe ndërmorën veprime të rëndësishme për kryerjen e këtyre veprave penale;

nxitën dhe ndihmuan kryerjen e veprave penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës;

nxitën kryerjen e veprave penale të pengimit të personave zyrtarë në kryerjen e detyrave zyrtare, frikësimit gjatë procedurës penale, hakmarrjes dhe shkeljes së fshehtësisë së procedurës, dhe u tentua kryerja e këtyre veprave penale; dhe/ose

nxitën kryerjen e veprave penale të pengimit të personave zyrtarë në kryerjen e detyrave zyrtare, frikësimit gjatë procedurës penale dhe shkeljes së fshehtësisë së procedurës përmes zbulimit të identitetit dhe të dhënave personale të dëshmitarëve të mbrojtur, dhe vepra të tilla penale nuk u kryen, e as u tentua të kryheshin.

48. Hysni GUCATI dhe Nasim HARADINAJ mbajnë përgjegjësi penale individuale për:

Pika 1: PENGIM TË PERSONAVE ZYRTARË NË KRYERJEN E DETYRAVE ZYRTARE, me anë të kërcënimit të rëndë, midis më së paku 7 dhe 25 shtatorit 2020,

VEPËR PENALE KUNDËR RENDIT PUBLIK, e ndëshkueshme në bazë të neneve 17, 28, 31, 32(1)-(3), 33, 35, dhe 401(1) e (5) të KPK-së, dhe neneve 15(2) dhe 16(3) të Ligjit;

Pika 2: PENGIM TË PERSONAVE ZYRTARË NË KRYERJEN E DETYRAVE ZYRTARE, me anë të pjesëmarrjes në veprimin e përbashkët të një grupi, midis më së paku 7 dhe 25 shtatorit 2020, VEPËR PENALE KUNDËR RENDIT PUBLIK, e ndëshkueshme në bazë të neneve 17, 28, 32(1)-(3), 33, 35, dhe 401(2)-(3) e (5) të KPK- së, dhe neneve 15(2) dhe 16(3) të Ligjit;

Pika 3: FRIKËSIM GJATË PROCEDURËS PENALE, midis më së paku 7 dhe 25 shtatorit 2020, VEPËR PENALE KUNDËR ADMINISTRIMIT TË DREJTËSISË DHE ADMINISTRATËS PUBLIKE, e ndëshkueshme në bazë të neneve 17, 28, 31, 32(1)-(3), 33, 35, dhe 387 të KPK-së, dhe neneve 15(2) dhe 16(3) të Ligjit;

Pika 4: HAKMARRJE, midis më së paku 7 dhe 25 shtatorit 2020, VEPËR PENALE KUNDËR ADMINISTRIMIT TË DREJTËSISË DHE ADMINISTRATËS PUBLIKE, e ndëshkueshme në bazë të neneve 17, 28, 31, 32(1)-(2), 33, 35, dhe 388(1) të KPK-së, dhe neneve 15(2) dhe 16(3) të Ligjit;

Pika 5: SHKELJE TË FSHEHTËSISË SË PROCEDURËS, përmes zbulimit të paautorizuar të informacionit të fshehtë të nxjerrë në procedura zyrtare, midis më së paku 7 dhe 25 shtatorit 2020, VEPËR PENALE KUNDËR ADMINISTRIMIT TË DREJTËSISË DHE ADMINISTRATËS PUBLIKE, e ndëshkueshme në bazë të neneve 17, 31, 32(1)-(2), 33, 35, dhe 392(1) të KPK-së, dhe neneve 15(2) dhe 16(3) të Ligjit; dhe

Pika 6: SHKELJE TË FSHEHTËSISË SË PROCEDURËS, përmes zbulimit të paautorizuar të identitetit dhe të dhënave personale të dëshmitarëve të mbrojtur, midis më së paku 7 dhe 25 shtatorit 2020, VEPËR PENALE KUNDËR ADMINISTRIMIT TË DREJTËSISË DHE ADMINISTRATËS PUBLIKE, e ndëshkueshme në bazë të neneve 17, 28, 31, 32(1)-(3), 33, 35, dhe 392(2)-(3) të KPK-së, dhe neneve 15(2) dhe 16(3) të Ligjit.

49. Të gjitha pjesët e kësaj Aktakuze duhen lexuar në lidhje me njëra-tjetrën.

/nënshkrim/ ____________________

Xhek Smith Prokurori i Specializuar

E hënë, 14 dhjetor 2020 Në Hagë, Holandë.

Aktakuza afro 20-faqëshe kundër tyre është publikuar në formë të redaktuar. Gucati e Haradinaj akuzohen për nxjerrjen e dokumenteve konfidenciale të Gjykatës Speciale për tri herë me radhë gjatë shtatorit të këtij viti.

Aktakuzën mund ta lexoni në shqip: KËTU.

commentFirst article

Lexo të radhës

Kosova kremton 9 majin - Ditën e Evropës, ndërsa mbetet e fundit në rajon në proceset integruese Knaus: Gjermania, Franca dhe Italia po planifikojnë të vënë veton Kosovës në Këshillin e Evropës Nga QKUK-ja japin detaje për policin i cili u plagos në Zllakuqan - ja si është gjendja e tij

Më të lexuarat

25 vjet nga masakra e Studimes së Vushtrrisë

Bakoyannis i përgjigjet fyerjeve të ekstremistëve të Vuçiqit, pas deklaratës së saj për Kosovën

Deputetja tregon për një porosi që ia çoi Kosovës një deputet i Këshillit të Evropës

Bien shërbimet e telefonisë Vala, deklarohet Telekomi i Kosovës

Sot mund të lexoni

Shfletoni kopertinat

Opinione

Ismail Muçiqi

Kush po e udhëheq Serbinë: Vuçiqi apo kisha ortodokse ne krye me Porfirije?!

Gani I. Mehmeti

Koordinimi i strategjisë për dialogun nga O’Brien Kosovë-Serbi, lajm i mirë!

Ilir Levonja

Enveristi që ndërtoi Kremlinin shqiptar

Faton Mehmeti

Komandant Drini, njeriu që ndaloi ndarjen e Prizrenit, nuk ishte uzurpator dhe mbështeste Rugovën

Intervista

Çfarë do të ndodhë me votimin mbi anëtarësimin e Kosovës në KiE? Flet Maliqi dhe tregon çka po i kërkohet Prishtinës

“Kosova e Palestina, dy çështje të ndryshme”, politologu spanjoll: S’ka ekuilibër në BE - pasiguri nëse...!

Avokati serb: Nuk mund të pritet qeveri proevropiane nga Vuçiq, idetë e Millosheviqit janë ende të gjalla

Knaus: Kushtëzimi i anëtarësimit të Kosovës në KiE me krijimin e Asociacionit pamundëson realizimin e të dyjave

Kronikë e zezë

Gjendet i vdekur një person në Deçan

Aksident trafiku te Parku i Biznesit

Arrestohet një polic në Gjakovë, dyshohet për ngacmim seksual të një të miture

2071 tiketa trafiku brenda 24 orëve

Speciale

Arkeologët kroatë e gjejnë një përkrenare ilire, është më shumë se 2500 vjet e vjetër

Zbulohet “buka më e vjetër në botë” në Turqi

Gjendet një kafkë gjigante e përbindëshit prehistorik të detit në Angli

Zbulimi i majmunit 8.7 milionë vjeçar në Turqi rishkruan historinë e njerëzimit

Perkujtime

RAMË (REXHË) MURIQI

1932-1999 Çdo Pranverë që vjen për ne është e zymtë me kujtimet me të trishta, kur në pragun e...

Sefedin (Muharrem) Nimonaj

Sot, u bënë 6 vite pa më të dashurin tonë, Dinin. Këto vite të gjata sa gjashtë shekuj, rëndohen...

Kreshnik (Brahim) Rama

Edhe pse fizikisht nuk je me ne, në zemrat dhe mendjen tonë gjithmone ki me qenë. Nuk do ta harrojmë kurrë dashurinë,...

Kreshnik (Brahim) Rama

Koha që po kalon me shpejtësi të madhe neve nuk po arrin ta tretë dhimbjen, që na e ka shkaktuar mungesa jote. Zemra e ka...

Bota e Yjeve

Camila Cabellos i shqyhet fustani në ‘Met Gala’ dhe i ekspozohen të brendshmet

Camila Cabello pësoi një mosfunksionim të garderobës pas mbrëmjes ‘Met Gala’ të hënën në...

Një zonjë misterioze vodhi vëmendjen në Met Gala, konsiderohet se ishte e veshur më së miri

Në Met Gala të këtij viti ndër të tjera erdhi edhe sipërmarrësja indiane Mona Patel. Ajo kishte veshur një...

Aktuale

Publikohet aktakuza e plotë kundër Gucatit e Haradinajt, ja për çka akuzohen ata

Lexo të radhës

Krasniqi: Në Ditën e Evropës Kosova shënon muajin e 11 të sanksioneve

Bien shërbimet e telefonisë Vala, deklarohet Telekomi i Kosovës

Zëdhënësja e Komisionit Evropian: Kosova dhe Serbia rrezikojnë të humbasin shanse të mëdha

Vjosa Osmani uroi presidenten e re të Maqedonisë, ajo i replikon - ja fjalët e saj

Incidenti në kishën e Zllakuqanit ku mbeti i plagosur një polic, reagon Sveçla

Inaugurohet Konsullata e Përgjithshme e Kosovës në Poloni

MPJD: Kosova e rikonfirmon përkushtimin e saj për integrim në BE

Reagon Qeveria e Kosovës: Lajmi për përfundimin e mandatit të Escobar, nuk doli prej nesh

Osmani: Shqiptarët e Amerikës janë ura më e fuqishme e aleancës së Kosovës me SHBA-të

Kryesia malteze e OSBE-së: Do të vazhdojmë ta mbështesim misionin tonë në Kosovë

Szunyog: Të punojmë dhe rregullojmë edhe më mirë raportet ndërmjet Kosovës dhe BE-së

Vjosa Osmani tregon se si Kosova do ta konsiderojë BE-në

Në Ditën e Evropës, Haradinaj kërkon heqjen e masave

Vajzën ia vranë në Fushë Kosovë, shpërthejnë në lot prindërit e Claras

Vjosa Osmani uron Silanovskan që fitoi zgjedhjet në RMV

Në Ditën e Evropës, Rohde: Shpresojmë se Kosova do të bëhet anëtare e BE’së një ditë

Vdes veterani i UÇK-së

Ramadani: Sot tek ne është festë ndërsa në shtetet e Evropës nuk e di që ka pushim për 9 maj

Këngëtarja Teuta Selimi viktimë e dhunës në familje, e denoncon bashkëshortin dhe vëllain

VV-ja fiton një mandat deputeti në Maqedoninë e Veriut

Presidenca belge deklarohet pro heqjes së masave ndaj Kosovës

PDK-ja për Ilir Konushevcin: Vrasja e Ilirit ishte humbje e madhe për UÇK-në

Hoti i reagon Kurtit: Kur Kosova koordinohet me aleatët, anëtarësohet - nuk kushtëzohet

Pacolli kërkon që Evropa të jetë më konkrete, miqësore dhe korrekte ndaj Kosovës

Burimet e REL-it zbulojnë a është Kosova në agjendën e Komitetit të Ministrave të KiE-së

Ky është polici që u plagos nga hajnat sot në Zllakuqan

Ambasadori shqiptar: Doktor Hazir Malajn e kam të familjes, kishte një dashuri të zjarrtë për Kosovën

Hoxhaj: Kosova pa asnjë njohje qe katër vite, i ka humbur momentumi ndërkombëtar

Haradinaj kujton Ilir Konushevcin: Humbja e tij ishte goditje e rëndë për ne

Ambasadori italian në Beograd: S’është momenti që Kosova të anëtarësohet në KiE - Asociacioni element kyç

Kushtëzimi i Kosovës me Asociacion, reagojnë nga Vetëvendosje

Basha: Evropa e përkushtuar ta mbajë Kosovën jashtë saj

Bekim Haxhiu: Ky është Albin Kurti - përçarësi i shqiptarëve, pse po i faktorizon serbo-maqedonët

O’Brien, Escobar e Lajçak koordinojnë strategjitë për dialogun Kosovë-Serbi

Kurti: Ilir Konushevci, emër i artë në historinë moderne të Kosovës

Një epokë e re në dialogun Kosovë-Serbi, tre “lojtarë” të mëdhenj po zëvendësohen, ja kush do ta ketë në dorë fatin e bisedimeve

26 vjet nga vrasja e gjeneral Ilir Konushevcit

Delegacioni 30 anëtaresh bavarez viziton Kosovën

KFOR-i gjen një pushkë me 13 fishekë të varur në një pemë në Zveçan

Rexhaj i VV-së: Kosova nuk ka humbur aspak nga masat e BE-së, Serbia po ledhatohet nga Perëndimi

Imeri: Serbia provoi të aneksonte veriun e Kosovës, kjo u ndalua - humbëm me vendosjen e masave nga BE-ja

Vdiq në aksidentin e tmerrshëm me Ferrari në Itali, sot varroset 40-vjeçari nga Juniku

Ish-ministri mbështet Kurtin: Jo Asociacion për anëtarësimin në KiE, Shqipëria ka vetëm një rrugë

Kadrijaj e AAK-së: Kur po kërkojmë heqjen e masave, BE po na liston veprimet që duhet bërë Kosova

Deputetja e PDK-së: Kurti nuk ka kredibilitet, Dita e Evropës nuk është dashur të festohet

Dita e Evropës – aktivitete për fëmijë dhe koncert në orët e mbrëmjes në sheshin e Prishtinës

Ismet Kryeziu tregon kush i organizon zgjedhjet më mirë, Maqedonia apo Kosova?

Ismail Muçiqi

Gani I. Mehmeti

Ilir Levonja

Faton Mehmeti

RAMË (REXHË) MURIQI

Sefedin (Muharrem) Nimonaj

Kreshnik (Brahim) Rama

Kreshnik (Brahim) Rama

Camila Cabellos i shqyhet fustani në ‘Met Gala’ dhe i ekspozohen të brendshmet

Një zonjë misterioze vodhi vëmendjen në Met Gala, konsiderohet se ishte e veshur më së miri