Deputeti i Aleancës për Ardhmërinë e Kosovës, Bekë Berisha, i është kundërpërgjigjur nënkryetarit të LDK-së, Agim Veliu, i cili ka thënë se të gjitha partitë në vend duhet të ulen në një tryezë për të zgjidhur çështjen e presidentit të vendit.
Në një prononcim, Berisha ka theksuar se AAK-ja është “pro” diskutimit me partitë në vend për çështjen e presidentit ose shkuarjes në zgjedhje.
“Nuk i komentoj deklaratat e Agim Veliut, po që tre muaj jemi duke u merr me këtë çështje por, duhet të ulemi të flasim për president ose për zgjedhje”, ka thënë fillimisht Berisha.
Derisa thekson, se president i vendit duhet të jetë ai që i dhemb trupi nga plagët e marra në luftën për çlirimin e Kosovës.
Berisha edhe njëherë ka përsëritur se qëndrojnë prapa propozimit të tyre që president i vendit të jetë kreu i AAK-së, Ramush Haradinaj.
“Ne duhet me diskutu me të gjitha partitë propozimin tonë. Ne qëndrojmë prapa propozimit tonë, president duhet të jetë ai që i dhemb trupi nga plagët e luftës, pra plagët që i ka marrë në luftë për Kosovë, kështu duhet të jetë presidenti”, ka shtuar Berisha.
Ndryshe, nënkryetari i Lidhjes Demokratike të Kosovës (LDK), Agim Veliu ka thënë se të gjitha partitë në vend duhet të ulen në një tryezë për të zgjidhur çështjen e presidentit të vendit.
“LDK është gatshme për zgjedhje në çdo kohë. Kryetari i LDK-së, Isa Mustafa e ka bërë të qartë se cila është rruga për me ardhur deri te një marrëveshje në lidhje me presidentin. Rruga e vetme është që partitë të gjitha të ulen në një tryezë dhe të bisedohet se si mund të dilet nga kjo situatë për sa i takon zgjedhjes së presidentit. Përndryshe, ose kështu, ose ndryshe nuk bën, kjo nuk mendoj se është rruga dhe gjuha e duhur për zgjidhjen e problemeve”, ka thënë Veliu.
Mundësinë e shkuarjes në zgjedhje s’e ka përjashtuar edhe kreu i ekzekutivit, Avdullah Hoti.
“Jemi në përpjekje për të tejkaluar situatën për takim. Nuk përjashtohet edhe mundësia e organizimit të zgjedhjeve”, është shprehur Hoti sot gjatë një konference për medie.
Derisa, Ramush Haradinaj thotë se nëse nuk ka marrëveshje për kandidaturën e tij, atëherë vendi do të shkojë në zgjedhje.
