Procesi i numërimit të votave është duke shkuar drejt fundit, deri me tani KQZ-ja ka arritur që t’i numëroj rreth 99% të kutive të votimit.
Sipas rezultateve preliminare, partia e cila i ka fituar zgjedhjet është Lëvizja Vetëvendosje me rreth 48%.
Ende pritet të numërohen votat me postë dhe votat me kusht, ku KQZ-ja do të bëjë certifikimin e zgjedhje, dhe më pas t’i hapet rrugë konstituimit të Kuvendit dhe votimit të Qeverisë së re.
Lidhur me formimin e Qeverisë, ka folur njohësi i çështjeve ligjore, Kolë Krasniqi.
Ai tha se pret që në tri javët e ardhshme të formohet Qeveria e re e Kosovë.
“Unë besoj që KQZ shpejt do t’i certifikon zgjedhjet për faktin se nuk ka asnjë pengës ligjore numërimi i votave është në përfundim e sipër edhe votat e diasporës dhe ato me kusht nuk kanë ndonjë neglizhencë për t’i numëruar dhe besoj që Qeveria e Kosovës do të zgjidhet shumë shpejt brenda dy tri javëve të ardhshme”, tha Krasniqi.
Krasniqi tha se Kurti nuk ka asnjë pengës ligjore që të bëhet Kryeministër i vendi.
“Mundë të zgjidhet kryeministër nuk ekziston asnjë pengës ligjore, edhe pse partitë opozitare kanë paralajmëruar se do të kërkojnë mendimin e Gjykatës Kushtetuese, i cili shpresoj se do të jetë negativ dhe nuk do ta hendikepoj zgjedhjen e Albin Kurtit kryeministër deri në shtator kur skadon afati tre vjeçar për mosushtrimin e funksioneve publike për shkak të një dënimi me kusht”, tha ai.
Edhe njohësi tjetër i çështjeve kushtetuese, Kushtrim Palushi ka thënë se Kuvendi duhet brenda 30 ditëve të konstituohet dhe mandej të zgjidhet Qeveria poashtu edhe Presidenti i ri.
“Atëherë Kuvendi brenda 30 ditëve do të konstituohet dhe mandej dy çështjet kryesore që është zgjedhja e Presidentit dhe zgjedhja e Qeverisë, cila do prej këtyre që vihet në agjendë e para, përderisa Qeveria nuk ka problem që të zgjidhet sepse Vetëvendosja me gjasë do të i ketë votat e nevojshme për formimin e Qeverisë”, ka thënë ai.
Palushi më tutje është shprehur se VV-ja nuk do të ketë problem të formojë Qeverinë, por që ka rrezik te zgjedhja e Presidentit kur dihet se 81 deputet duhet të jenë në sallë të Kuvendit për kuorum.
“Por Presidenti ka rrezik që të mos mund të zgjidhet nëse në sallë të Kuvendit nuk rrinë më shumë se 80 deputetë gjatë votimit të kandidaturës të zonjës Osmani Presidente”, ka thënë Palushi.
Nga zgjedhjet e djeshme, me numërimet e deritanishme parti fituese ka dalë Lëvizja Vetëvendosje.
Kujtojmë që në dhjetorin e 2020-ës, Gjykata Kushtetuese shpalli të pavlefshëm votimin e qeverisë së Kosovës të drejtuar nga Avdullah Hoti, vendim ky që pasoi pas kërkesës së lëvizjes Vetëvendosje për vlerësimin e ligjshmërisë së pjesëmarrjes në votim për qeverinë e udhëhequr nga Lidhja Demokratike të deputetit Etem Arifi, i cili ishte i dënuar me 1 vjet e 3 muaj heqje lirie për “mashtrim me subvencione”.
Qeveria e Hoti u miratua me 61 vota në parlamentin me 120 vende, minimumi i mundshëm për konfirmimin e një qeverie të Kosovës, e cila kishte nevojë vetëm për një votë më shumë se 50 për qind për t’u miratuar.
E që pa votën e Arifit, ky minimum nuk do të ishte arritur.
Arifi më 3 qershor votoi në favor të ngritjes së qeverisë së re të kryeministrit Avdullah Hoti.
Etem Arifi, në prill të vitit 2018, ishte dënuar me dy vjet burgim, për përvetësimin e rreth 26 mijë eurove. Dënimi i zotit Arifi, ishte konfirmuar edhe nga Gjykata e Apelit, të datës 20 gusht 2019, me të cilin dënimi me burgim ishte ulur në një vit e tre muaj.
