Komisioni për të Drejtat e Njeriut, Barazi Gjinore, për Persona të Pagjetur dhe Peticione ka miratuar të hënën planin e punës sё Komisionit për vitin 2021-të.
Gjatë shqyrtimit të draft-planit, anëtarja e komisionit nga Vetëvendosjes, Saranda Bogujevci paraqiti disa propozime para anëtarëve të këtij komisioni, ku ndër tjerash ishte edhe propozimi për realizimin e një hulumtimi në vendet e rajonit lidhur me procedurat për zgjedhjen e Avokatit të Popullit dhe zëvendësve.
Sa i përket takimeve të komisionit, Bogujevci tha se është e rëndësishme që fillimisht të bëhet monitorimi i implementimit të ligjeve nga institucionet përkatëse e pastaj të realizohen takimet që bëhen karshi monitorimit.
Bogujevci: Të marrim shembuj nga rajoni për zgjedhjen e Avokatit të Popullit dhe zëvendësve të tij
“Njëra prej propozime që ka ardhur është Projektligji për peticione, në mandatin e kaluar veçse e kemi kaluar në lexim të parë, por për shkak të shpërndarjes së Kuvendit ka filluar procesi nga e para. Kështu që, kisha propozu me e fut si pjesë të planit[...]Propozimi tjetër ka të bëjë me problematikat dhe mangësitë e ligjit që kemi pasur për Avokatin e Popullit. Kjo do të thotë ka qenë shqetësim prej të gjitha palëve, kemi parë edhe problematikat që kemi pasur për zgjedhjen e zëvendësve, të njëjtat i kemi pasur edhe për zgjedhjen e Avokatit të Popullit. Ndoshta si pikë e parë me e bë një lloj hulumtimi si është e rregulluar në rajon, dhe nëse mundemi me marr shembuj përtej e pastaj me fillu me procesin e plotësim-ndryshimit të ligjit”, tha ajo.
Deputetja tjetër e Lëvizjes Vetëvendosje, Tinka Kurti kërkoi që të ndryshohet emri i Komisionit dhe të dërgohet në Kryesi për miratim.
Kurti: Po procedojmë iniciativën për ndryshimin e emrit të Komisionit
“Ne po e procedojmë, nëse kryesia na thotë ndryshe atëherë mundemi me vepru ndryshe. Iniciativën ose tekstin e kam të gatshëm, nuk e kam shkruar në emër personal, pak a shumë si komision. Është e planifikuar me u vënë nënshkrimi i të gjithë anëtarëve të komisionit, që me u fuqizu më shumë”, u shpreh ajo.
Me kërkesë të kryetares së Komisionit, Duda Balje, u vendos që Projektligji për Peticione t’i dorëzohet Kuvendit për lexim të parë Kuvendit në muajin qershor.
