Presidentja e vendit Vjosa Osmani, ka dhënë një intervistë ekskluzive për Al Jazeera Balkans, në të cilën është diskutuar pa dyshim edhe çështja e dialogut mes Kosovës dhe Serbisë.
Osmani ka potencuar se gjatë procesit të dialogut, ka një numër parimesh jashtëzakonisht të rëndësishme të cila duhet adresuar, megjithatë ajo thekson se negociatat duhet zhvilluar në mënyrë të barabartë, sepse janë dy shtete të pavarura përballë njëra –tjetrës.
“Ekzistojnë një numër parimesh jashtëzakonisht të rëndësishme që duhen adresuar dhe respektuar gjatë këtij procesi.
Së pari, dialogu duhet të ndodhë në mënyrë të barabartë, sepse ne të dy jemi vende të pavarura dhe sovrane.
Së dyti, dialogu duhet të respektojë integritetin territorial të Kosovës, sovranitetin dhe funksionimin e saj të brendshëm dhe mënyrën e ndërtimit të tij nga pikëpamja kushtetuese.
Dhe së treti, DUHET të adresojë çështjet e drejtësisë.
Për ne, duke u siguruar që ne të dimë vendndodhjet e personave të zhdukur, që më shumë se 1600 familje në Kosovë e dinë vendndodhjet e të dashurve të tyre është përparësia kryesore në këtë proces”.
